لاہور۔ 20 اکتوبر (اے پی پی) وزیر جان جوڑی پنجاب ڈاکٹر یاسمین راشد نا کماشی ٹی فاطمہ جناح میڈیکل یونیورسٹی ٹی سینڈیکیٹ نا دیوان اڈ ہلک ہراٹی وائس چانسلر پروفیسر ڈاکٹر عامر زمان خان، پرووائس چانسلر پروفیسر ڈاکٹر شیریں خاور، باسک پنجاب اسمبلی عائشہ نواز، رجسٹرار، ایم ایس گنگارام ہسپتال ڈاکٹر احتشام، ایم ایس مزنگ ٹیچنگ ہسپتال و ایلوآفیسر آک ساڑی ئسر۔ رجسٹرار فاطمہ جناح میڈیکل یونیورسٹی دیوان اٹی ایجنڈا نا مندرجہ جات آتے پیش کرے۔ صوبائی وزیر جان جوڑی دیوان اٹی مدر اینڈ چائلڈ ہسپتال گنگارام نا جوڑ کننگ نا پیش رفت نا ہم پارے۔ صوبائی وزیر دیوان اٹی بیست می سینیڈیکیٹ دیوان نا فیصلہ غاتے پک کرے۔ سینیڈیکیٹ دیوان اٹی فاطمہ جناح میڈیکل یونیورسٹی و محلقہ ادارہ غاتے ٹی ایڈہاک آ ملازم آتا ودکی نا منظوری ءِ تننگا۔ سینیڈیکیٹ دیوان اٹی فاطمہ جناح میڈیکل یونیورسٹی ٹی پیتھالوجی ڈیپارٹمنٹ نا ری ویمپنگ کن فنڈ انا منظوری آن بیدس دیوان اٹی اسسٹنٹ پروفیسر آف وریولوجی نا سیٹ انا منظوری ءِ تننگا۔ سینیڈیکیٹ دیوان اٹی مزنگ ٹیچنگ ہسپتال اٹ ہوسٹل نا پیش رفت نا سرجم آتیان ہم معلومدار کننگا۔ ڈاکٹر یاسمین راشد پارے کہ مدر اینڈ چائلڈ ہسپتال گنگارام نا کاریم ترندی اٹ برجاءِ، پنجاب نا غٹ مدر اینڈ چائلڈ ہسپتال آتیا پیش رفت برجاءِ۔ اوپارے کہ وزیراعظم عمران خان نا کنڈآن پنجاب نا الس کن ہفت مدر اینڈ چائلڈ ہسپتال ٹیکی اسے۔
