اسلام آباد۔ 20 اکتوبر (اے پی پی) بنجائی وزیر اقتصادی امور مخدوم خسرو بختیار پارینے کہ پاکستان نا حکومت ڈھانچہ جاتی اصلاحات نا پروگرام ءِ مون آ دننگ اٹ سنبرینگوک ءِ۔ داہیت ءِ او جہانی بینک و جہانی مالیاتی فنڈ انا سالانہ دیوان نا وخت آ اِرا ورچوئل دیوان آتیٹی پاکستان نا ڈل انا کماشی ءِکرسا پارے۔ پاکستانی ڈل اٹی وزیراعظم نا خصوصی کمکار پٹرولیم ندیم بابر، گورنر و ڈپٹی گورنر اسٹیٹ بینک و وزارت اقتصادی امور، وزارت خزانہ، ایف بی آر و امریکہ ٹی پاکستانی سفارتخانہ نا بڑزکو کمامدارآک اوار ئسر۔ پاکستانی ڈل انا اولیکو ورچوئل میٹنگ سویلی ایشیانا ڈیہہ کن جہانی بینک انا نائب صدر ہارتھ شیفراتون اڈ ہلک۔ جہانی بینک انا نائب صدر کوویڈ۔ 19 نا دین اتون مون تننگ کن پاکستان نا کوشست آتا ستاءِ کرے۔ اوحکومت نا کنڈآن خاص کر بجلی، گورننس و مالیاتی بشخ آتیٹی اصلاحات نا پروگرام نا ستاءِ کرے و پارے کہ داٹی پاکستان اٹی اقتصادی نمو و کوویڈ۔ 19 آن بحالی نا عمل ءِ سوگوی رسینگک۔ اوپارے کہ مشکل نا داوخت اٹی جہانی بینک پاکستان تون کمکاری ءِ برجاتخک۔ دیوان اٹی جہانی بینک انا پاکستان اٹی برجا و آخبت نا ڈٹ آتا ہم جاچ ءِ ہلنگا۔ بنجائی وزیر آخبتی مخ تفی و کمکاری آ جہانی بینک انا منت واری ءِ ہرفے و پارے کہ پاکستان زرگزران، گورننس و ادارہ جاتی اصلاحات نا عمل ءِ مون آ دننگ اٹ سنبرینگوک ءِ۔ اوپارے کہ درملکی ڈٹ آتا منظوری، نفاذ و اوفتا باضابطہ چاروکی نا عمل ءِ سادہ کننگ انگ ءِ۔ بنجائی وزیر کورونا ویکسین نا بابت پدتموک ملک آتیکن جہانی بینک انا 12 ارب ڈالر نا سلاہ ئی ڈٹ انا ستاءِ کرے۔ بنجائی وزیر نا سلاہ غا جہانی بینک انا نائب صدر باوری کرفے کہ اصلاحات نا برجاعمل اٹ بینک تینا کمک ءِ فراوان کیک۔ پاکستانی ڈل جہانی فنانس کارپوریشن نا ایشیاء و بحرالکاہل نا ڈیہہ کن نائب صدر الفانسوگارسیاتون ہم ورچوئل دیوان اس منعقد کرے۔ بنجائی وزیر آئی ایف سی نا کنڈآن پاکستان اٹ بناکروک آڈٹ آتا ستاءِ کرے۔ بنجائی وزیر خاص کر بنداوی پنجر، ہاؤسنگ و سیل و سوات نا بشخ آتیٹی آئی ایف سی نا زرکاری ٹی ودکی نا گرج آ زور شاغا۔ بنجائی وزیر پارے کہ ساڑی حکومت نجی بشخ انا کمک اٹ ودکی نا عمل ءِ مون آ دننگ آ یخین تخک۔ اوپارے کہ کوویڈ۔ 19 نا دور اٹی آئی ایف سی پاکستان اٹ چنکا و نیامئی درجہ نا کاروبار نا کمکاری ءِ بایدے کے۔ آئی ایف سی نا نائب صدر دورہ پاکستان نا سلہ غا بنجائی وزیر نا منت واری ءِ ہرفے۔ اوپاکستان اٹ اصلاحات نا عمل نا ستاءِ کرے۔
