اسلام آباد۔ 20 اکتوبر (اے پی پی) وزیر خارجہ مخدوم شاہ محمود قریشی سے شنبے نادے آ آذربائیجان نا وزیر خارجہ جے ہون بائر موف تون ٹیل فون آ رابطہ کرے۔ ہڑتوم آ راہشونک ہڑتوم آ کنڈآتا تعلقداری، آذربائیجان و آرمینیا نا نیام اٹ مروک آ بے چیٹی تون اوار تین پہ تینی است خواہی نا باندات آ گپ وتران کریر۔ ہڑتوم آ وزیر خارجہ غاک واپار، تعلیم و دودوربیدگ تون اوار کثیر الجہتی بشخ آتیٹی ہڑتوم آ کنڈآتا کمکاری ءِ پین مون آ دننگ آ امنا کریر۔ شاہ محمود قریشی پارے کہ پاکستان ءِ ’’نگورنوکاراباخ‘‘ اٹی امن و ایمنی نا مخدوش حالیت آتیا گڑتی ءِ۔ آرمینیا نا کنڈآن آذربائیجان نا خلقی آبادی آ گولہ باری مذمت نا قابل ءِ۔ پاکستان دامشکل وخت اٹی آذربائیجان نا سرکڑدہ و الس تون تفوک ءِ۔ وزیر خارجہ پارے کہ نن نگور نوکاراباخ انا بابت آذربائیجان نا موقف نا مخ تفی ءِ کینہ۔ آذربائیجان و آرمینیا نا نیام اٹ انسانی بنداو تیا پڑوکروک جنگ بندی امن و سوگوی کن اسہ جوان ءُ پیش رفت اسے۔ شاہ محمود قریشی پارے کہ کڑدہ غاتا نیام اٹ پائیدار امن نا سیبو اقوام متحدہ نا سلامتی کونسل نا قرارداد آتیا پورو عملدرآمد و آذربائیجان نا علاقہ غاتیان آرمینیائی فوج انا کشنگ آ مریک۔ آذری وزیر خارجہ ساڑی جھیڑہ ٹی پاکستان نا کنڈآن پبی مخ تفی آ وزیر خارجہ نا منت واری ءِ ہرفے۔ وزیر خارجہ پارے کہ آذربائیجان نا کنڈآن او آئی سی رابطہ پڑک تون اوار، جہانی فورم تیا کودک کشمیری تا پبی مخ تفی ستاکڑزک۔ ہڑتوم آ وزیر خارجہ غاک پاکستان و آذربائیجان نا نیام اٹ ہڑتوم آ کنڈآتا تعلقداری نا وڑتیا است جمی نا درشانی ءِ کریر۔ وزیر خارجہ مخدوم شاہ محمود قریشی آذربائیجان نا وزیر خارجہ ءِ دورہ پاکستان نا سلہ خلک ہرادے او منت واری اتون امنا کرے۔
