اسلام آباد۔ 19 اکتوبر (اے پی پی) صدر مملکت ڈاکٹر عارف علوی پارینے کہ دنیا پاکستان نا کورونا نا دین اتون مون تننگ نا حکمت عملی نا ستاءِ کننگ ءِ، قوم ہندا عزم اتون دا دین انا مقابلہ ءِ کننگ کن رکھی گام گیج آتیا عمل ءِ برجاتخے۔ دوشنبے نادے آ تینا ٹویٹ اٹی اوپارے کہ کنا ہنین آ پاکستانیک نم غریب آتا خیال ءِ تخارے اللہ تعالیٰ غان دعا خواہارے و داسہ دنیا نما سفت ءِ کننگ ءِ دا جہانی دین اتون مون تننگ کن پاکستانی قوم انا گام گیج آتا اعتراف ءِ کننگ ءِ۔ اوپارے کہ اسہ مون آ بروک ءُ قوم اسے آن تعلق مننگ نا سوب کس اس نمے نما حقی عظمت نا دوئی کننگ آن توننگ کپک۔ صدر مملکت امریکہ نا مسکوہی وزیر خزانہ و چاہندار زرگزران لیری سمرز نا کنڈآن کورونا نا دین اتون مون تننگ نا بابت پاکستان نا سفت نا حوالہ ءِ تس ہراٹی اوپاریسس کہ امریکہ ہنداوڑانا ڈٹ آ عمل کرسا کھرب آ ڈالر تے بچفنگ کریکہ۔ اوتینا بیان اٹی وزیراعظم عمران خان نا کنڈآن اختیار کروک سمارٹ لاک ڈاؤن نا پالیسی نا حوالہ ءِ تسوسس ہراڑآن کورونا نا دین انا تالانی ءِ توننگ اٹ کمک رسینگا۔ صدر مملکت جہانی ادارہ جان جوڑی نا سروک ٹیڈروس ایڈہانوم گیبریسس نا ہم حوالہ ءِ تس ہرا پاکستان نا سفت ءِ کرسا پاریسس کہ پاکستان کورونا نا دین انا مون ءِ تورینے و داسہ پاکستان نا زرگران شون ہلیک انتئے کہ ملک اٹی سوگوی ءِ۔
