اسلام آباد۔ 19 اکتوبر (اے پی پی) وزیر خارجہ مخدوم شاہ محمود قریشی تون حزب اسلامی اوغانستان نا سروک گلبدین حکمت یار ڈل اتون اوار دوشنبے نادے آ وزارت خارجہ ٹی اوڑدہی کرے۔ اوڑدہی ٹی پاک اوغان ہڑتوم آ کنڈآتا تعلقداری، اوغانستان اٹی امن کن برجا بین الاوغان مذاکرات تون اوار تین پہ تینی است خواہی نا باندات آتیا گپ وتران کننگا۔ دفترخارجہ نا رداٹ وزیر خارجہ حزب اسلامی اوغانستان نا سروک گلبدین حکمت یار و اونا ڈل ءِ وزارت خارجہ غا بننگ آ بخیر اٹ پارے وخت اس کہ حزب اسلامی اوغانستان نا سروک پارے کہ پاکستان، ءِ نن تینا ارٹمیکو اُراسمجھنہ۔ وزیر خارجہ شاہ محمود قریشی پارے کہ ڈیہہ نا امن و سوگوی اوغانستان اٹی آخبتی امن تون گنڈوک ءِ۔ پاکستان، خلوص نیت اٹ اوغان امن عمل اٹی تینا خیرخواہی کڑد ءِ ادا کننگ ءِ و آخبت ہم کرسا کیک۔ شاہ محمودقریشی پارے کہ وزیراعظم عمران خان پیدوار وڑاٹ پاریسس کہ اوغان ویل انا دیرپاایسری، نا اسٹ انگا کسر، اوغان سرکڑدہ ءِ قابل قبول سیاسی مذاکرات ءِ۔ ننے خوشی ءِ کہ اینو جہانی کہول آ، پاکستان نا موقف نا ستاءِ کننگ انگ ءِ۔ وزیر خارجہ پارے کہ بین الاوغان مذاکرات، نا حالیت اٹ اوغان سرکڑدہ غاتون، اوغانستان اٹ امن نا بحالی نا اسہ جوان ءُ موقع اسے۔ پاکستان، اوغانستان تون اوار ڈیہہ ٹی امن کن تینا کوشست آتے برجاتخک۔ سیکرٹری خارجہ سہیل محمود، اوغانستان کن پاکستان نا نمائندہ خصوصی ایمبیسیڈر محمد صادق ئسک ہم داوخت آ ساڑی ئسر۔ حزب اسلامی اوغانستان نا سروک گلبدین حکمت یار نا دا دورہ، پاکستان و اوغانستان نا نیام اٹ گیشتر ہڑتوم آ کنڈآتا رابطہ غاتا مون آ دننگ کن کروک آ کوشست آتا اہم ءُ بشخ اسے۔
