اسلام آباد۔ 19 اکتوبر (اے پی پی) کابینہ نا اقتصادی رابطہ کمیٹی (ای سی سی) بروک آ سیزن اٹی خولم نا امدادی نہاد اٹی ودکی نا جاچ ءِ ہلنگ کن کمیٹی اس جوڑ کرینے، سید فخر امام، ڈاکٹر عبدالحفیظ شیخ، ڈاکٹر عشرت حسین، ڈاکٹر وقار مسعود، ندیم بابر، عبدالرزاق داؤد، اسد عمر و مخدوم خسروبختیار آ تالان کمیٹی خولم نا امدادی نہاد اٹی ودکی نا جاچ ءِ ہلنگ تون اوار اوار کھد خاص کر ڈی اے پی آ سبسڈی تننگ کن سلاہ ہم تیار کیک، ای سی سی برآمدی بشخ(مسکوہی زیروریٹڈ شعبہ جات) آتیکن بجلی، آرایل این جی و گیس انا رعایت کن رجسٹریشن نا وڑوڈول نا اصولی منظوری ءِ تسنے۔ اقتصادی رابطہ کمیٹی نا دیوان دوشنبے نادے آ داڑے وزیراعظم نا سلاہکار خزانہ و محصولات ڈاکٹر عبدالحفیظ شیخ نا کماشی ٹی کابینہ ڈویژن اٹی اڈ ہلک۔ دیوان اٹی برآمدی بشخ(سابق زیروریٹڈ شعبہ جات)آتیکن بجلی، آر ایل این جی و گیس انا رعایت کن رجسٹریشن نا وڑوڈول انا اصولی منظوری ءِ تننگا۔ ای سی سی دا زراعانت ءِ بیرہ حقدار بشخ آتے فراوان کننگ نا پک کننگ نا پارت کرے۔ ای سی سی فیصلہ کرے کہ ایف بی آر نا کنڈآن تیار و برآمد کنندگان نا ایس آر او نمبر 1125 نا رداٹ تیار کروک زیروریٹڈ فہرست ءِ کاریم اٹ اتنگ مریک۔ ایف بی آر وزارت واپار نا ایس جی ٹی او 117 نا رداٹ پنچ برآمدی بشخ آتا پوسکن آ تیار و برآمد کنندگان آتا رجسٹریشن ءِ ہم کننگ کیک، ای سی سی فیصلہ کرے کہ ایف بی آر، پٹرولیم و پاور ڈویژن مسکوہی و ساڑی یونٹ آتا معیادی چیکنک، مانیٹرنگ یا واپسی نا حکمت عملی و غلط معلومداری نا فراوانی یا دا آسراتی نا غلط کاریم اٹ اتنگ آ تادیبی کارروائی کننگ کیک۔ دیوان اٹی خولم نا کم آن کم امدادی نہاد آ سرجم گپ وتران مس۔ وزارت قومی غذائی رکھ و پٹ وپول نا کنڈآن کمیٹی ءِ پنجاب، خیبر پختونخوا، بلوچستان و بنجائی دارالحکومت آن چندی کساس آتا بابت سرجم حوال تننگا۔ دا ہیت آ امنا مس کہ بزغر آتا کمک و بروک آ سیزن اٹی خولم نا زیات مقدار اٹی بوائی کن دانا امدادی نہاد اٹی ودکی المی ءِ۔ دیوان اٹی کشاری مداخل نا نہاد آتے معقول کننگ آہم گپ وتران کننگا تانکہ بزغر آتے جوان نرخ آتیا مداخل نا فراوانی ءِ پک کننگ مرے۔ ہنداوڑ دیہی زرگزران ءِ مون آ دننگ کن چندی گام گیج و فلور مل آتے خولم نا فراوانی ءِ ودفنگ نا ہم جاچ ءِ ہلنگا و پاننگاکہ داٹی خولم و نُت انا نہاد آتیا مون آ توننگ اٹ کمک رسینگک۔ دیوان اٹی کشاری بشخ انا بابت معلومداری نا دوئی کننگ کن گچین نظام اس جوڑ کننگ آ ہم گپ وتران مس۔ بروک آ سیزن اٹ خولم نا امدادی نہاد اٹی ودکی نا جاچ ءِ ہلنگ کن سید فخر امام، ڈاکٹر عبدالحفیظ شیخ، ڈاکٹر عشرت حسین، ڈاکٹر وقار مسعود، ندیم بابر، عبدالرزاق داؤد، اسد عمر و مخدوم خسرو بختیار آ تالان کمیٹی اس جوڑ کننگا۔ دا کمیٹی کھد خاص کر ڈی اے پی آ سبسڈی تننگ کن سلاہ ہم تیار کیک۔ دا سلاک بزغرآتیکن پیکج نا بشخ مریرہ و داڑآن کشاری مداخل نا خڑچ اٹ کمتی بریک۔ دیوان اٹی فیصلہ کننگاکہ نُت انا نہاد اٹی کمتی و سوگوی کن صوبہ غاک مارکیٹ اٹی زیات خولم ریلیز کیرہ۔ دیوان اٹی فیصلہ کننگاکہ ہندی حکومت آتے خولم و نُت انا نہاد آتا چاروکی کن پارت جاری کننگک تانکہ لس بندغ کن خولم و نُت انا نہاد آتیٹی ودکی مف۔ کمیٹی بروک آدیوان اٹی تینا سلاہ تے مون آ تخک۔
