اسلام آباد۔ 19 اکتوبر (اے پی پی) وزیر مملکت پارلیمانی امور علی محمد خان پارینے کہ پاکستان غٹ جہانی فورم تیا کشمیر نا ویل ءِ تالان کننگ اٹ سرسہب مسنے و مچ آ پاکستانی قوم بھارتی وزیراعظم مودی نا انتہاپسندانہ ذہنیت ءِ بے سہب کننگ کن کشمیری الس تون سلوک ءُ۔ ریڈیو پاکستان نا حالات حاضرہ نا پروگرام اٹی گپ وتران کرسا اوپارے کہ وزیراعظم عمران خان کشمیر نا مقدمہ ءِ کننگ ءِ و دا اولیکو موقع ءِ کہ پاکستان سرسہبی اٹ کشمیر نا ویل ءِ جہانی کہول آ تالان کرینے۔ اوپارے کہ دنیا مقبوضہ کشمیر اٹ بھارت نا غیر کانودی کوزہ غا پاکستان نا موقف ءِ امنا کیک۔ اوپارے کہ عمران خان دنیا ءِ باور کرفینے کہ نازی ازم آنبار بھارت نا ہندو توا نا نظریہ ہم جہانی امن کن گڑتی اسے۔ بنجائی وزیر نا پاننگ ئس کہ داسہ جہانی میڈیا ہم انسانی حق آتا لتاڑ و اقلیت آتون امتیازی سلوک آ بھارت ءِ تنقید نا ہدف کننگ ءِ۔ اوپارے کہ گڑاس بھلا ملک آک تینا اقتصادی فائدہ غاتا خاطر بھارتی طرز عل آ خاموشی اختیار کرینو۔ اومستی پارے کہ بھارت بھاز زیات آبادی والا ملک ءِ ہرانا شاریک چندی ملک آتیٹی کاریم کننگ ءُ و ہموڑے سوگو اثرورسوخ تخرہ۔ اوپارے کہ بدبختی اٹ امت مسلمہ اسلام مخالف سازش آتا مقابلہ ءِ کننگ کن یکجا افس۔ اسہ سوج اسے نا ورندی ٹی اوداہیت آ است ہسونی نا درشانی ءِ کرے کہ گڑاس زموار ریاستی ادارہ غاتا برخلاف ہیت کرسا بھارتی ایجنڈا ءِ سوگوی تننگ ءُ۔ اوزور شاغسا پارے کہ نن سیاسی اختلاف آتے اسہ کنڈ تخسا تینا قومی فائدہ غاتیکن یکجا مرین۔ اوپارے کہ پاک فوج نئے بیرہ پیشن نا ملک دہشت گردی نا چٹفنگ اٹ اہم کڑد ادا کرے بلکن ننا فوجیک لمہ وطن نا رکھ اکن ہڑدے قربانی تننگ ءُ۔ اوخبڑدار کرے کہ سلہہ بند فوج انا برخلاف بیان آتے اسُل سگنگ پننگک۔
