پشاور۔ 19 اکتوبر(اے پی پی) بنجائی وزیر حوالکاری و شینکاری سینیٹر شبلی فراز پارینے کہ پاکستان اٹی اینو پگہ بنارسی ٹھگ آتا ٹولہ ہڑدڑ تالان کننگ نا کوشست اٹی ءُ ولے الس ہرا 2018ء نا لس گچین کاری تیٹی داٹولہءِ مسترد کریر داوار ہم دا ٹولہ ءِ بے سہبی و نامرادی آن دوچار کیرہ۔ داخیال آتا درشانی ءِ او دوشنبے نادے آ پشاور پریس کلب اٹی ’’میٹ دی پریس‘‘ آن تران کرسا کرے، سینیٹر شبلی فراز پارے کہ پاکستان اٹی ساڑی آ سیاسی جنگ اِراواکدارآتا جنگ ءِ، اسہ واکدار ہمو ہرا40 سال ملک انا اقتدار ءِ جند انا جاگیر نا وڑاٹ کاریم اٹ ایسورو داوخت آ جند انا فائدہ غاتا پوروی، تہہ و پیشن نا ملک آتیٹی میرات آتیٹی ودکی و مال و دولت جوڑ کننگ کن قومی ادارہ غاتے بھسکاری آن دوچار کننگ آن سلتوس وخت اس کہ ایلو کنڈآ عمران خان و اونا ٹیم ءِ ہرا امانت و دیانت نا خواست آتا پوروی ءِ کرسا ملک ءِ وڈی خور ٹولہ نا بھسکاری تا زہم تیان نجات ترفنگ و اودے حقی شونداری وشونہالی نا کنڈآ دننگ کن دے و نن خواری کننگ ءِ۔ سینیٹر شبلی فراز پارے کہ دا ٹولہ مہالو اسمبلی تیٹی مرسا حکومت ءِ بلیک میل کننگ و خاص کر جند انا فائدہ غاتا دوئی کننگ نا کوشست کریر، داٹی اوفک ملکی فائدہ غاتیٹی کروک آ کانود سازی ٹی اڑاند شاغسا سلاہ ئی کانود آتیٹی من پسند ترمیم اوار کننگ کن زور شاغار ہرانا درور ایف اے ٹی ایف نا بابت کانود سازی ءِ ولے عمران خان اوفتا بلیک میلنگ اٹ بننگ آن انکار کرے و اصولی موقف ءِ تینا کرے ہرانا سوب آن پارلیمنٹ نا تہہ ٹی اپوزیشن نا چم آک سرسہب مننگ کتوس و داسہ دا ٹولہ بے سہب جلسہ غاتا کمک اٹ حکومت آ زور شاغنگ نا کوشست اٹی ءُ ہہرافتے الس مسترد کرینے۔ اوپارے کہ اوفتا حال دادے کہ مسکوہی وزیر خزانہ اسحاق ڈار ہرا داسہ پیشن نا ملک اٹی ءِ، مسکوہی دور حکومت اٹ ڈالر نا ریٹ آتے ودنگ آن مصنوعی وڑاٹ تورسا ملکی واپار و زرگزران ءِ ناقابل تلافی نسخان تس، اوپارے کہ پارلیمنٹ نا تہہ ٹی تینا بلیک میلنگ و چم آتے اٹ حکومت ءِ دباؤٹی اتنگ اٹ بے سہبی آن پد داسہ دا ٹولہ شوز انا پن آ فلاپ شوز کرسا الس ءِ ریفنگ و حکومت ءِ دباؤٹی اتنگ نا اسہ پین کوشست اس کننگ ءُ۔ ہرادے الس مسترد کرینے۔ شبلی فراز پارے کہ اوفتا حال دادے کہ تینا ہوم گراؤنڈ گوجرانوالہ ٹی ہم اسہ اسٹیڈیم اسے پُر کننگ کتوس وخت اس کہ مولانا فضل الرحمان آن تو خورک کڑسی تیان تران کرفنگا۔ ہمومولانا فضل الرحمان ہرا پارلیمنٹ اٹ صدارتی گچین کاری کننگ و تینا مار انا پارلیمنٹ اٹ ساڑی مننگ آن پد ہم اودے جعلی پارلیمنٹ پاننگ ءِ، اوپارے کہ دا ٹولہ وخت اس ہم نیوٹرل ایمپائرز نا ساڑی گری ٹی گچین کاری میچ کتنو، مدام مرضی نا ایمپائراس خلسا گچین کاری عمل اٹ بشخ ہلکر ہنداخاطرآن اوفتیان شفافیت کیدنگ مفننگ ءِ، اوپارے کہ مولانا سال آتیان کشمیر کمیٹی نا باسک مس و داوخت آ کشمیر معاملہءِ مڑدہ ءُ ہلی اس جوڑ کرسا تخا وخت اس کہ عمران خان جہانی کہول آ کشمیر نا ویل ءِ داوڑ ہرفینے کہ داسہ دنیا کشمیر نا ویل انا بابت پاکستان نا موقف ءِ امنا کننگ ءِ۔ سینیٹر شبلی فراز پارے کہ مسکوہی حکومت آتا پالیسی تا سوب حالیت آک داتسکان بسر کہ ہراتم عمران خان و اونا ٹیم ءِ اقتدار ملا تو پاکستان خواتہ مننگ نا خڑک ئس ولے عمران خان ملک ءِ خواتہ مننگ آن بچفے و ملکی زرگزران ءِ سوگوی نا کسر آ شاغا، بنجائی وزیر پارے کہ اینو پاکستان نا زرگزران مستین نا مقابلہ ٹی گچین ءِ، زررادہ کننگ و پیشن نا زرکاری ٹی پدریسہ ودکی مننگ ءِ ہرانا سوب دادے کہ پیشن نا ملک پاکستانی و زرکار آک ساڑی حکومت آ پت کننگ ءُ، اوپارے کہ نن اعتراف کینہ و ننے احساس ہم ارے کہ کبینی ٹی ودکی مس ولے دانا سوب دادے کہ کورونا دین انا سوب آن یورپ و امریکہ تون اوار مچ آ دنیا نا ملک آتا زرگزران بھاز بے وڑ زہمی مسر و سپلائی چین آ زہم تما ہرانا زہم آک پاکستان اٹ کبینی نا دروشم اٹ مون آ بسنو ولے دا ویل اتون مون تننگ کن اسہ جامع و گچین حکمت عملی اسے نا رداٹ مون آ ہِننگ انگ ءِ ہرانا مثبت زہم بروک آدے تیٹی مون آ بریک و کبینی ٹی کمتی واقع مریک۔ صحافی تا سوج آتا ورندی ءِ ترسا بنجائی وزیر حوالکاری پارے کہ پاکستان نا ادارہ خاص کر ہمو دفاعی ادارہ ہرافک ملک آن دہشت گردی نا چٹفنگ و امن اٹ نمان سرسہبی دوئی کرے ءِ نزور کننگ مدام ملک دشممن تا تغ مسنے و دابابت او سازش کرسا کیرہ۔
