اپوزیشن جماعت آک بیرہ تینا فائدہ غاتیکن یکجا مسنو، شہریار آفریدی

اسلام آباد۔ 19 اکتوبر (اے پی پی) پارلیمانی کشمیر کمیٹی نا چیئرمین شہریار خان آفریدی پارینے کہ حکومت ءِ اپوزیشن جماعت آتا سیوب آن ہچ ءُ فریشانی اس اف و وزیراعظم عمران خان تینا ٹیم اتون کرپٹ مافیا نا احساب آن اسُل پدی مفک۔ نجی ٹی وی چینل تون گپ وتران کرسا اوپارے کہ اپوزیشن گوجرانوالہ ٹی مخلوق ءِ مچ کننگ اٹ پورو وڑاٹ بے سہب مس، ہنداخاطرآن حکومت پی ڈی ایم نا مچی و جلسہ غاتیان خلیپک۔ اوپارے کہ ہرا مستین اسہ ایلو نا دشمن ئسر او داسہ قومی فائدہ غاتا رکھ و کشمیر کاز ءِ تالان کننگ نا جاگہ غا تینا جند انا ایجنڈا کن حکومت نا برخلاف اسٹ مسنو۔ اوپارے کہ قوم اپوزیشن نا ارادہ غاتے اسُل سرسہب مننگ کن الیپک انتئے کہ قوم دا مخلوق نا حقیقت ءِ چاہک و اپوزیشن راہشون تا اصل دروشم پاش مسنے۔ شہریار آفریدی مستی پارے کہ پی ٹی آئی نا حکومت کرپٹ مافیا نا چٹفنگ کن سنبرینگوک ءِ و او احتساب آ ہچ ءُ سمجھوتہ اس کپک۔ اوپارے کہ کشمیر نا ویل اپوزیشن نا ایجنڈاٹی اوار اف ہراڑآن اونا اہم قومی باندات آتیان غفلت پاش مریک۔ اوپارے کہ اپوزیشن پیشن نا ایجنڈا غا چلینگ انگ نا جاگہ غا کشمیر نا ویل ءِ سنجیدگی اٹ ہرفے۔ اوپارے کہ گڑاس اپوزیشن راہشونک تینا تقریر آتیٹی دشمن نا زبان ءِ کاریم اٹ اتسا قومی ادارہ غاتے ہدف کریر ہرانا اسُل موکل تننگ مفک۔ اسہ سوج اسے نا ورندی ٹی او پارے کہ برانز کننگ ہر شاری نا حق ءِ ولے ملک اٹ امن و ایمنی نا حالیت آتے خراب کننگ نا کوشست آتے اسُل سگنگ پننگک۔ اوپارے کہ پاک فوج دہشت گردی نا برخلاف جنگ اٹ بے مٹ قربانی تسنے ہنداخاطرآن ننے غٹ ءِ مرے کہ پاک فوج انا شرف ءِ کین۔ اوپارے کہ وزیراعظم عمران خان اسٹ انگا راہشون ءِ ہرا کبینی نا ویل ءِ ایسر کننگ کیک۔ اومستی پارے کہ ہڑدے ئی کاریم اٹ اتوک آ گڑاتا نہاد آتا مون ءِ توننگ نا ہروڑ کوشست کننگک۔ اوپارے کہ اپوزیشن بیرہ این آر او ہلنگ کن سیوت کرے۔ اوپیدوار کرے کہ وڈی خور زموارآتا احتساب آ سمجھوتہ نا سوج ہی ودی مفک و کس اسے این آر او تفننگک۔