اسلام آباد۔ 16 اکتوبر (اے پی پی) اسپیکر قومی اسمبلی اسد قیصر پارینے کہ صوبہ خیبرپختونخوا ءِ اللہ تعالیٰ بے پناہ قدرتی حسن و سیل وسواتی ہند تسنے، دا ہند آتیٹی انفراسٹرکچر نا تفنگ و بنداوی آسراتی تا فراوانی آن صوبہ ٹی سیل وسوات ءِ مون آ دننگ دوئی مریک۔ داخیال آتا درشانی ءِ او جمعہ نادے آ صوابی ٹی گوازی و سیل و سوات نا مون آ دننگ کن مروک آ جاچ دیوان نا کماشی ءِ کرساکرے۔ دیوان اٹی ڈائریکٹر جنرل سپورٹس خیبرپختونخوا، منیجنگ ڈائریکٹر سیل و سوات کے پی کے و ڈپٹی کمشنر صوابی تون اوار تعلقدار محکمہ غاتا سینئر آفیسر آک بشخ ہلکر۔ اسپیکر ڈائریکٹر جنرل سپورٹس خیبرپختونخوا و منیجنگ ڈائریکٹر سیل و سوات(کے پی کے) ءِ صوابی ٹی ورناتے مثبت سرجز فراوان کننگ کن گوازی تا پڑ و سیل و سواتی ہند آتا شونداری و شونہالی کن مربوط حکمت عملی اس جوڑ کننگ نا پارت کرینے۔ اوپارے کہ سیل و سوات نا مون آ دننگ آن زرگزرانی بشخ اٹی ترندی بریک و روزگار ناپوسکن ءُ وارخواہی ودی مریک ہراڑآن ہندی بندغ آتا زند انا آب بڑز مریک۔ اوپارے کہ صوابی نا ورناک گوازی تا پڑاٹ مدام ملک انا پن ءِ روشنا کرینو۔ اوپارے کہ ورناتے جان جوڑ سرجزآتیکن آسراتی تا فراوانی حکومت نا اولیت آتا بشخ ءِ۔ دیوان اٹی ساڑی ڈائریکٹر جنرل سپورٹس، منیجنگ ڈائریکٹر سیل وسوات(کے پی کے) و ڈپٹی کمشنر صوابی صوبہ ٹی سیل وسواتی ہند آتا شونداری و گوازی تا سرجز آتا بابت برجا ڈٹ آتا بارواٹ اسپیکر ءِ معلومدار کرے۔ اوپارے کہ صوبہ خیبرپختونخوا نا آبادی نا بھلو بشخ اس سیل و سوات نا بشخ اتون گنڈوک ءِ۔ دا بشخ انا صوبائی کہول آ شونداری کن غٹ تر وسیلہ غاتے کاریم اٹ اتنگک۔ ڈپٹی کمشنر صوابی اسپیکر ءِ صوابی ٹی شونداری ڈٹ آتیا برجا کاریم آ مروک آ پیش رفت و امن و ایمنی نا حالیت آتا بابت اسپیکر ءِ معلومدار کرے۔ اوپارے کہ صوابی ٹی گوازی تا مون آ دننگ و ورناتے جان جوڑ سرجزآتیٹی بشخ ہلنگ کن گوازی تا پڑ تتون اوار ایلو سیل وسواتی ہند آتیا انفراسٹرکچر کننگ انگ ءِ۔
