این آر او تننگ و سمجھوتہ کننگ آسان ءُ کسراس ، ولے دا تباہی اسے، بڑزکو تعلیم و پٹ وپول آ پبی چکار کننگ اُن، کارڈیک سٹنٹ نا تیاری آن درمان آ بروک آ خڑچ آتیٹی کمتی بریک، مصنوعات آتا ویلیو ایڈیشن آن زرگزران ءِ سوگو کننگ مریک، وزیراعظم

اسلام آباد۔ 16 اکتوبر (اے پی پی) وزیراعظم عمران خان پارینے کہ این آر او تننگ و سمجھوتہ کننگ آسان ءُ کسر اسے ولے دا تباہی اسے، حکومت نالج اکانومی ءِ مون آ دننگ کن پبی کمک کیک، بڑزکو تعلیم و پٹ وپول آ پبی چکار کننگ اُن، ہندی کہول آ کارڈیک سٹنٹ نا تیاری آن است انا مریض آتا درمان آ بروک آ خڑچ آتیٹی کمتی بریک، 70 نا دہائی ٹی قومیانہ نا پالیسی صنعتی عمل ءِ زہمی کرے، سمندر پار پاکستانیک ملک انا اہم میرات ءُ، ملک ءِ سہی کنڈآ درینن۔ داخیال آتا درشانی ءِ او جمعہ نادے آ نسٹ اٹی این۔ اویٹو ہیلتھ ٹیکنالوجی نا بنائی دود آن تران کرسا کرے۔ وزیراعظم پارے کہ ہندی کہول آ کارڈیک سٹنٹ نا تیاری اہم ءُ پیش رفت اسے، ہراڑآ نسٹ انتظامیہ ءِ مبارکبادی ایتیوہ۔ اومیت ءِ کہ ایلو یونیورسٹیک ہم دا درور نا تقلید ءِ کیرہ۔ دا گام گیج آن است انا مریض آتا درمان آ بروک آ خڑچ آتیٹی کمتی بریک۔ اوپارے کہ شونداری نا سفر اٹ مزل و سمت انا تعین بھاز المی ءِ۔ مستین بدبختی اٹ ننا ادارہ غاتا نیام اٹ رابطہ نا کمتی نظر بس ہرانا سوب آن مچ آ نظام اٹی خرابی ءِ۔ اوپارے کہ قومک طے کیرہ کہ ننے ہرانگ ہنوئی ءِ، حکومت ءِ سنبھالان تو برآمد آتا مقابلہ ٹی درآمد آک بھاز زیات ئسر۔ درآمد آتا مالیت 60 ارب مالیت و برآمد آک 20 ارب ڈالر ئسر۔ واپاری نسخان زرگزران آ بھاز بھلو بھاریم اس ئس۔ ڈالر زیات ملک آن پیشن ہنارہ ہرانا سوب ڈالر نا کوڑیک کم مسر و روپئی نا قدر ہم تما۔ روپئی نا قدر اٹی کمتی آن درآمدی گڑاک کبین مسر۔ ڈالر نا کمتی ءِ پورو کننگ کن آئی ایم ایف آ ہنوئی تما۔ اوپارے کہ ترکی برآمد آتا چکار کرسا زرگزران ءِ شون تس۔ اوپارے کہ 60 انا دہائی ٹی ملک سہی کنڈآہناسس وخت اس کہ 70 نا دہائی ٹی قومیانہ نا پالیسی صنعتی عمل ءِ زہمی کرے۔ وزیراعظم پارے کہ مصنوعات آتا ویلیو ایڈیشن آن زرگزران ءِ سوگو کننگ مریک۔ تینا ذہنیت نا بدلی و سہی کنڈانا تعین ءِ کرینن۔ ملک اٹی صنعتی انقلاب اس اتوئی ءِ۔ اوپارے کہ دولت نا پیداوار کن زرکاری نا است بڈی ءِ کروئی ءِ۔ کاروبار کن سازگار چاگڑد اس فراوان کننگ کن گام گیج کننگ اُن۔ اوپارے کہ سمندر پارپاکستانیک ملک انا اہم میرات ءُ۔ ننے ملکی شونداری کن پیشن نا ملک رہینگوک آ پاکستانی تے حصہ دار کروئی ءِ۔ ننے تینا ورناتا پبی لائخی تے کاریم اٹ اتوئی ءِ۔ اوپارے کہ رسول کریم صلی اللہ علیہ و آلہ وسلم نا ذات مبارک ننکن رول ماڈل اسے۔ جہد و خواری اٹ سرسہبی دوئی مریک۔ شارٹ کٹ و فراڈ اٹ سرسہبی مننگ کپک۔ اوپارے کہ بڑز وژن آ عمل کرسا بھاز انگا مشکل پیش بریک۔ وزیراعظم پارے کہ غٹ داڑیل آک یکجا مریر، اوفتے بشخنگ ، اوفتے این آر او تننگ و سمجھوتہ کننگ آسان ءُ کسر اسے ولے دا تباہی اسے۔ مشکل فیصلہ غاک ہی بڑزا دیرہ۔ اوپارے کہ حکومت نالج اکانومی نا مون آ دننگ کن پبی کمک کیک۔ خوانہ کہ بڑزکو تعلیم و پٹ وپول آ مرکزی چکار کننگے۔ داکان مست بنجائی وزیر سائنس اینڈ ٹیکنالوجی چوہدری فواد حسین دود آن تران کرسا پارے کہ ٹیکنالوجی نا بشخ اٹی شونداری آن قومک شون ہلیرہ۔ حکومت 50 سال آن پد صنعت، تعلیمی ادارہ و دفاع نا بشخ آتیٹی تین پہ تینی تعلق ءِ جوڑ کرینے۔ اوپارے کہ ننا زرگزران نا زیات تر سیبو برآمدآتیاٹی ءِ۔ نن تینا وسیلہ غاتے کاریم اٹ اتسا شون تسونن۔ اوپارے کہ کورونا دین انا دین بس تو ننتون بنداوی رکھی گڑاہم ساڑی الوکہ۔ بنجائی وزیر پارے کہ اینو نن کورونا نا بابت رکھی گڑا برآمد کننگ اُن۔ است انا سٹنٹ نا ملک اٹی تیاری بھاز اہم ءُ گام اسے۔ اوپارے کہ فیصل آباد صنعتی زون اٹی 200 ایکڑ آ میڈیکل سٹی اس جوڑ کننگانے۔ ننا آخبت علم و ٹیکنالوجی تون گنڈوک ءِ۔