کھٹمنڈو۔ 21 ستمبر (اے پی پی) بھارت ءِ تینا چنکا ہمسایہ ملک نیپال آن اسہ وار ولدا شرمندگی تون مون تروئی تما، ہراتم نیپال تینا نظرثانی مروک سیاسی نقشہ ءِ باضابطہ وڑاٹ اسکول آتا نصاب اٹ اوار کرے و داٹی او اہم علاقہ غاک ہم اوار ءُ ہرافتیا بھارت نا دعویٰ ءِ کہ دااونا ءُ۔ کشمیر میڈیا سروس نا رداٹ نیپالی پارلیمنٹ 13 جون 2020 آ ملک انا پوسکن آ نقشہ ءِ امنائی وڑاٹ منظور کریسر ہراٹی لیپو لیکھ، کالاپانی و لمپیادھورانا علاقہ غاک اوار ءُ ہرافتا بارواٹی بھارت نا دعویٰ ءِ کہ دا اونا علاقہ غاک ءُ۔ کھٹمنڈو اسکول نا نصاب تعلیم اٹ پوسکن آ درسی کتاب آتے درستی راستی کرفینے ہرافتے ٹی ملک انا نظر ثانی مروک سیاسی نقشہ اوار ءِ و اوٹی ہندا بڑزکو مسہ اہم ہند آتے ملک انا بشخ انا وڑاٹ نشان تننگانے۔ انفارمیشن آفیسر گنیش بھٹارائی پارے کہ وزارت تعلیم نا رداٹ کوریکلم ڈویلپمنٹ سینٹر ساڑی ٹی نظر ثانی مروک نقشہ تون کتاب آتے شینک کرے۔ نیپال نا کابینہ نا کنڈآن پوسکن آ نقشہ ءِ پک کننگ آن پد حکومت نا ترجمان و وزیر خزانہ یووراج کھٹی واڈا صحافی تے پاریر کہ حکومت پوسکن آ سیاسی نقشہ ءِ آئین و اسکول نا نصاب اٹ اوار کننگ نا فیصلہ کرینے۔ بھارت نا وزیر دفاع راج ناتھ سنگھ 8 مئی آ اتراکھنڈ نا خڑک دھارچولہ کودرہ لیپو لیکھ تون ملوک آ اسٹریٹجک لحاظ اٹ بے کچ اہم 80 کلو میٹر مریس روڈ انا بناءِ کریسس اوکان پد بھارت و نیپال نا نیام اٹ تعلقداریک خراب مسر۔
