بھارت امریکہ انسداد دہشت گردی اسیجائی ورکنگ پڑک نا اعلامیہ ٹی پاکستان نابے سوب حوالہ ءِ مسترد کینہ، پاکستان
اسلام آباد۔ 15 ستمبر (اے پی پی) پاکستان بھارت امریکہ 17 می انسدادِ دہشت گردی اسیجائی ورکنگ پڑک نا اعلامیہ غا ردعمل نا درشانی ءِ کرسا اعلامیہ ٹی پاکستان نا بلاجواز حوالہ ءِ سختی اٹ مسترد کرینے۔ سے شنبے نادے آ ترجمان دفتر خارجہ پارے کہ نن دا چرجوئی ٹی تینا گڑتی تے امریکی تعلقدار کمامدارآتسکان سرکرینن، ترجمان پارے کہ گرج داہیت انا ءِ کہ غٹ شریک ملک آک سویلی ایشیائی ڈیہہ نا امن و ایمنی تون گنڈوک ویل آتا تذکرہ، ڈغاری راستکی تے مون آ تخسا کیر و اسہ کنڈی و راستکی تیان چپ سلاہ تیان احتراز کیر۔ ترجمان پارے کہ جہانی برادری دا حقیقت آن جوانی اٹ بلد ءِ کہ پاکستان ہندوستان نا ایما و کمکاری آ مبنی سرحد پار آن مروک آ دہشت گردی نا گواچی مسنے۔ جہانی برادری پاکستان نا دہشت گردی نا برخلاف کروک آ کوشست، قربانی و اوفتے ٹی دوئی مروک آ سرسہبی تے ہم امنا کیک۔ ترجمان پارے کہ پاکستان داہیت انا وار وار آ درشانی ءِ کرینے کہ آر ایس ایس نا ایجنڈا غا روان بی جے پی سرکار نا غیر زموارانہ رویہ، اقلیت آتون ناروا سلوک، مقبوضہ کشمیر اٹ ریاستی دہشت گردی و پاکستان و ڈیہہ نا ایلو ملک آتا برخلاف بھارت نا جارحانہ سلوک، مچ آ سویلی ایشیائی ڈیہہ نا امن ءِ خطرہ غاتیان دوچار کننگ ءِ۔ ترجمان پارے کہ جہانی برادری بھارت آ زور شاغے کہ او ڈیہہ نا امن و سوگوی آن چپ رویہ ءِ تینا کننگ آن پاناد کے۔
