آجوئی ءِ روچ ایمان، آجوئی، راجی جزم ءِ علامت اِنت ، چیئرمین سینیٹ

اسلام آباد۔14اگست  (اے پی پی): سینیٹ ءِ چیئرمین سید یوسف رضا گیلانی ءَ گوشت کہ آجوئی ءِ روچ ایوک ءَ یک تاریخ ءِ نہ انت بلکیں ایمان، آجوئی، حاکمی ءُ راجی جزم ءِ علامت انت۔ پاکستان ءِ 80می آجوئی ءِ روچ ءِ درگت ءَ جمعہ ءِ روچ ءَ کنونشن سینٹر ءَ راجی آجوئی ءِ روچ ءِ مراگش ءَ گوں گشتانک دیان ءَ آئی ءَ گوشت کہ اے روچ برصغیر ءِ مسلمان آنی راجدپتری جہد ءِ یات ءَ دنت۔ مراگش ءَ پارلیمانی کارانی وفاقی وزیر ڈاکٹر طارق فضل چوہدری، راجی اسمبلی ءِ ڈپٹی اسپیکر سید غلام مصطفی شاہ، وفاقی پارلیمانی سیکرٹری اھوالکاری ءُ نشریات ءِ بیرسٹر دانیال چوہدری ءُ ایندگر مزنیں کارندہ آں ھم بھر زوری کت۔ مراگش ءَ مزنیں کساسے ءَ مردم، نودربر ءُ ازمکاراں بہر زرتگ ات۔ اے موہ ءِ سر ءَ نودربر ءُ ازمکاراں راجی زیمر پیش داشتگ اَنت۔ سید یوسف رضا گیلانی ءَ قائداعظم محمد علی جناح ءُ ہما مردماں کہ پاکستان موومنٹ ءِ وھد ءَ وتی جان ندر کتگ انت آہاں یات کت۔ آئی ءَ ھما شھید آناں ھم داد دات کہ آیاں ملک ءِ ایمنی ءُ دفاع ءِ واستہ وتی سر ندر کتگ اَنت۔ آئی ءَ گوشت کہ پاکستانی راج ءَ را وتی بہادریں سلاہ بندیں اُرد آنی سر ءَ پھر انت۔ آئی ءَ گوشت کہ سرجمیں راج ملک ءِ رکھینگ ءَ سلاہ بندیں اُرد ءِ گوما اوشتاتگ۔ چیئرمین سینیٹ ءَ گوشت کہ زالبول ملک ءِ دیمروئی ءِ تہ کلیدی قوت انت۔ آئی ءَ وانگ ءُ زانگ، جان سلامتی، روزگار ءُ اقتصادی بااختیار کنگ ءِ تہ ءَ زالبول آناں یک وڑیں موہ پجارینگ ءِ سر ءَ زور پر دات۔ آئی ءَ ورنا آناں پاکستان ءِ ارزشتی ایں مڈی ءُ آیوکیں باندات گوشت۔ چیئرمین سینیٹ ءَ سائنس، ٹیکنالوجی ءُ ڈیجیٹل معیشت ءِ تہ ءَ ورنا آنی واستہ وانگ ءُ زانگ، ہنر ءُ موہ پجاری ءِ ضلورت ءِ سر ءَ زور پر دات۔ آئی ءَ گوشت کہ ملک ءَ را اوشتاتگیں جیڈھ آں چہ گر ءُ چیل بوھگ ءِ واستہ راجی یکوئی، کانود ءِ حکمرانی، میرٹ ءُ انصاف المی انت۔ راجی معیشت ءَ را مھکم کنگ ءِ واستہ صنعت، کشت ءُ کشار، برآمدات ءُ نوکیں ٹیکنالوجی ءِ تہ ءَ سرمایہ کاری المی اِنت۔ آئی ءَ گوشت کہ برجمیں دیمروئی ءِ واستہ وانگ ءُ زانگ، جان سلامتی، روزگار ءُ کاروباری موہ آنی تہ ءَ گیشی ھم المی اِنت۔ سید یوسف رضا گیلانی ءَ گوشت کہ پاکستان ایوک ءَ زمین ءِ ٹکرے نہ انت بلکیں یک نظریہ یے ءُ راجی کمیٹمنٹ انت ۔ آئی ءَ اے گپ ءِ سر ءَ زور پر دات کہ کانود درست ءِ واستہ برابر بہ بیت۔ آئی ءَ نزوریں ٹک آنی رکھینگ ءُ اقلیت آنی ھک آنی احترام کنگ ءِ سر ءَ ھم زور پر دات۔ چیئرمین سینیٹ ءَ گوشت کہ پنجاب، سندھ، خیبر پختونخوا، بلوچستان، گلگت بلتستان ءُ آزات کشمیر پاکستان ءِ یکوئی ءِ رنگ اَنت۔ آئی ءَ گوشت کہ ملک ءِ جتائیں زبان، دود ءُ ربیدگ ءُ دود ءُ ربیدگ نزوری نہ اَنت بلکیں راجی مھکم اَنت۔ چیئرمین سینیٹ ءَ گوشت کہ پاکستان ھمساھگیں ملک ءُ میاں اوستمانی براتی ءِ گوما کمک ءُ وت مہ وتی شرپ ءِ بنیات ءَ ایمن سیادی لوٹ ایت۔ آئی ءَ گوشت کہ پاکستان جنگ ءَ چہ گیش گپ ءُ تران، تعاون ءُ سفارتکاری ءَ را گیش دوست دار ایت۔ سید یوسف رضا گیلانی ءَ مکہ ءِ دفاعی معاہدہ ءَ را پاکستان ءِ واستہ مزنیں سفارتی ءُ اسٹریٹجک سوبمندی لیک اتگ۔ آئی ءَ گوشت کہ اے قولبند ءَ چہ دمگی کمک، اعتماد سازی ءُ اجتماعی ایمنی ءِ واستہ نوکیں موہ پیداک بوتگ انت۔ آئی ءَ گوشت کہ پاکستان ءِ سفارتی ءُ دفاعی سوبمندی آئی ءِ سیاسی ءُ جنگی سروکی ءِ وژن ءِ آسر اَنت۔ صدر ءِ صدر آصف علی زرداری، مزن وزیر محمد شہباز شریف ءُ فیلڈ مارشل سید عاصم منیر ءِ سروکی ءَ پاکستان دیم ءَ جنزان انت۔ آئی ءَ کشمیری راج ءِ وت واجہی ءِ ھک ءِ واستہ پاکستان ءِ حمایت ءِ ھم پدر کت۔ آئی ءَ گوشت کہ پاکستان فلسطین ءِ مظلومیں اُلس ءِ واستہ انصاف، آجوئی ءُ وت واجہی ءِ واستہ دیم ءَ ھم کمک کنت ۔ آئی ءَ گوشت کہ پاکستان ءَ را یک مھکمیں، وشھال، ایمن، جمہوری ءُ شرپداریں ملک جوڑ کنگ ءِ واستہ راج جزمیگ انت۔ چیئرمین سینیٹ ءَ اے گپ ءِ سر ءَ زور پر دات کہ راجی مفاد ذاتی ءُ سیاسی اختلاف ءَ چہ برز بہ بیت۔ آئین ءَ ملکی دیمروئی ءِ سفر ءَ را برجاہ دارگ ءِ وھد ءَ آئین ءُ جمہوری ادارگ آناں مھکم کنگ ءِ سر ءَ زور پر دات۔ آئی ءَ گوشت کہ پاکستانی راج ءَ مدام جزم، دلیری ءُ یکوئی ءَ گوں چیلنج آنی دیمپانی کتگ۔ سید یوسف رضا گیلانی ءَ راج ءَ را زور پر دات کہ قائداعظم ءِ ”ایمان، یکوئی ءُ نظم ءُ ضبط“ ءِ اصولاں راجی زند ءِ ھاتر ءَ عملی رہشونی اصول جوڑ بہ کنت۔ آئی ءَ وتی گشتانک ءِ گڈسرا پاکستان ءِ استحکام، وشھالی، امن ءُ دیمروئی ءِ واستہ دعا ءِ گوما گڈ کت۔ مراگش ءِ گڈسرا سینیٹ ءِ چیئرمین سید یوسف رضا گیلانی ءَ نودربر ءُ ازمکاراں گوں گند ءُ نند کتگ ءُ آہانی گوما اکس ہم کشتگ۔