اسلام آباد۔ 14 ستمبر (اے پی پی) اسپیکر قومی اسمبلی اسد قیصر تون صوبہ خیبرپختونخوا نا وزیر جان جوڑی و خزانہ تیمور خان جھگڑا دوشنبے نادے آ پارلیمنٹ ہاؤس اٹی اوڑدہی کرے۔ اوڑدہی ٹی ملک انا جم سیاسی و زرگزرانی حالیت آتیا گپ وتران کننگا۔ اسپیکر اسد قیصر خیبر پختونخوا نا حکومت نا کنڈآن السی راجی آسراتی کن چست کروک آ گام گیج آتا ستاءِ کرسا دااومیت نا درشانی ءِ کرے کہ ساڑی صوبائی حکومت وزیراعظم عمران خان نا وژن نا رداٹ صوبہ ءِ شونداری نا کنڈآ دننگ اٹ سرسہب مریک۔ اوخیبر پختونخوا حکومت نا کنڈآن مچ آ صوبہ نا الس کن جان جوڑی کارڈ آتا جاری کننگ و کورونا دین انا تالانی ءِ توننگ کن صوبہ ٹی گچین بست وبند آتا ہم ستاءِ کرے۔ اوپارے کہ خیبر پختونخوا ٹی سیل و سواتی و تاریخی ہند آک صوبہ کن اسہ نہادی ءُ میرات اسے نا حیثیت تخرہ دا ہند آتیا آسراتی تا فراوانی آن سیل و سوات ءِ مون آ دننگ دوئی مریک و پسماندہ علاقہ نا الس ءِ روزگار نا وارخواہی دُوبریک۔ صوبائی وزیر جان جوڑی و خزانہ اسپیکر اسد قیصر ءِ صوبہ نا چندی بشخ آتیٹی اتوک آ اصلاحات و برجا شونداری ڈٹ آتیان معلومدار کرے۔ اوپارے کہ صوبہ ٹی سیل و سوات نا بشخ ءِ شونداری تننگ کن اولیتی بنداو تیا گام گیج کننگ انگ ءِ۔ اومستی پارے کہ صوبائی حکومت وزیراعظم عمران خان نا وژن نا رداٹ صوبہ ٹی جان جوڑی، تعلیم، کشت وکشار و جنگل آتا بشخ آتیا خصوصی چکار کننگ ءِ۔ صوبائی وزیر جان جوڑی و خزانہ اسپیکر نا منت واری ءِ ہرفسا ایوان اٹی اونا بے کنڈ ہلوک کڑد انا ستاءِ کرے۔
