اسلام آباد۔ 14 ستمبر (اے پی پی) صدر مملکت ڈاکٹر عارف علوی پارینے کہ پاکستان اٹی اسلامی بینکاری نا نظام ءِ مون آ دننگ کن سنجیدہ کوشست مننگ ءِ، اسلام اسہ بشخ اسے ٹی ہم استحصال نا موکل تفک، بیرہ کٹیا کننگ اولیت مف، ایلیٹ ازم (خواص نا حکمرانی نا دستور آ اعتقاد) راج آتے گھن آنبار کُننگ ءِ، اسلام اٹی ایلیٹ ازم انا تصور اف، کوویڈ۔ 19 مالیاتی منڈی تیکن چیلنج اسے نا حیثیت تخک، اسلامک فنانسنگ نا بنداو بیرہ لین دین آ آخا بلکن صلہ رحمی آٹے، زالبول و نزور تپہ غاتیکن بینکنگ و فنانسنگ نا آسراتی تے ودفنگ نا گرج ءِ۔ داخیال آتا درشانی ءِ صدر مملکت دوشنبے نادے آ 10 می گلوبل اسلامک فنانس ایوارڈز نا دود آن مہمان خاص انا حیثیت اٹ تران کرسا کرے۔ صدر مملکت پارے کہ دا دود انا اڈتننگ ستاکڑزک دانا کمک اٹ اسلامک فنانسنگ نا بشخ اٹ نمان خذمت سرتروک آتا امنا ءِ کننگانے۔ اوپارے کہ مچ آ دنیا ٹی اسلامی بینکاری و مالیاتی نظام ءِ وسعت ملنگ ءِ۔ پاکستان اٹ اسلامی بینکاری نا نظام ءِ مون آ دننگ کن ہم سنجیدہ کوشست مننگ ءِ۔ پاکستان اٹی 17 درسد بینکاری اسلامی کانود آتا رداٹ مننگ ءِ، اسلامک فنانسنگ نا بشخ گلوبل فنانسنگ اٹ کم ءِ۔ اوپارے کہ اسٹیٹ بینک و ایلو ادارہ غاک اسلامی بینکاری ءِ شون تننگ کن کوشست کننگ ءُ۔ الس اٹ ہم دابابت بھلو معلومداری اس ارے۔ صدر مملکت پارے کہ اسلامک فنانسنگ نا بشخ اٹ بھاز کاریم کننگانے ولے دا اسہ بھلو بشخ اسے ہراٹی گچینی اتنگ کن کوشست کننگ انگ ءِ۔ اوپارے کہ کوویڈ۔ 19 نا حالیت اٹ بینکاری نظام نا زی آ بھاز زور تما و مالیاتی منڈی تیکن اسہ بھلو چیلنج اس جوڑ مرسا مون آ بسنے۔ صدر مملکت پارے کہ بیرہ لین دین اسلامک فنانسنگ نا بنداو اف بلکن اسلامک فنانسنگ نا بنداو صلہ رحمی آٹے۔حکومت نا احساس پروگرام نا بنداو ءِ ہم ہنداڑآ تخنگانے۔ اسلام اسہ ہندن ءُ راج و مالیاتی نظام اسے نا خواہندار ءِ ہراڑے راجی انصاف، مساوات، بریبری و شفافیت ساڑی مرے۔ راجی و زرگزرانی شونداری کن دولت نا ساف بشخنگ المی ءِ۔ کاروباری سرجزآتیٹی کٹیاتون اخلاقیات نا ہم خیال ءِ تخنگے۔ اوپارے کہ اسلام اسہ بشخ اسے ٹی ہم استحصال نا موکل تفک۔
