کوئٹہ۔ 02مارچ(اے پی پی) صوبائی وزیر داخلہ میر سرفراز بگٹی پارینے کہ بلوچ قوم اسہ عظیم ئُ تاریخ و دودوربیدہ اس تخک اینو بلوچستان تون اوار مچ آ ملک اٹی بلوچ دودوربیدہ ئِ تالان کننگ کن بلوچ کلچر ڈے جوش و جوزہ اٹ اڈتننگ انگ ئِ، ہموقومک شونداری کننگ کپسہ ہرافک تینا رسم و رواج و دودوربیدہ ئِ گیرام کیرہ۔ داخیال آتا درشانی ئِ او بلوچ کلچر ڈے انا مناسبت آن ملینیئم مال کوئٹہ ٹی اڈ تروک آ دود آن تران کرسا کرے۔ وزیر داخلہ میر سرفراز بگٹی پارے کہ بلوچ آتا تاریخ اٹی مہمان، نیاڑی و چناتے حالیت جنگ اٹی ہم عزت و شرف نا نظراٹ ہُننگک ولے بدقسمتی آن گڑاس عنصر بلوچ قوم انا پن ئِ کاریم اٹ اتسا مستین اٹی بلوچستان اٹی ڈاکٹر و استاد آتا بے درردی اٹ خون ئِ کریر ولے داسہ ننے تینا ہنوک آ وقار ئِ بڑز کروئی مریک، اوبھٹکوک آ بلوچ آتے مخاطب کرسا پارے کہ اوآجوئی نا نام نہاد جنگ ئِ ہلسا قومی دنگ اٹی پدی برسا پاکستان و بلوچ قوم انا شونداری ٹی تینا کڑد ئِ ادا کیر ، میر سرفراز بگٹی پارے کہ حکومت و کانود نافذ کروک آ ادارہ غاتادے و نن نا خواری نا سوب بلوچستان اٹی امن نا دے پاش کرے و مستین نا مقابلہ ٹی صوبہ ٹی امن وایمنی نا حالیت آتیٹی نمان گچینی بسنے۔
