اسلام آباد۔ 15 جولائی (اے پی پی) وزیراعظم نا خصوصی کمکار قومی جان جوڑی ڈاکٹر ظفرمرزا پارینے کہ پاکستان اٹی جان جوڑی نا کارندہ غاک است جمی اتون بے مٹ خذمت سرتننگ ءُ و پوسکن آ کوروناوائرس نا کیس آتا کچ اٹی کمتی نا سہرا فرض شناس ہیلتھ ورکرآتا کاٹم ہم ارے۔ چارشنبے نادے آ داخیال آتا درشانی ءِ او ٹویٹر آ ہیلتھ کیئر ورکر آتا پن ویڈیو کلہو، اوپارے کہ ڈاکٹر، نرس و پیرامیڈیکل اسٹاف نا کنڈآن ریکارڈ کروک آ ویڈیو کلہو وزارت جان جوڑی نا’’وی کیئر‘‘ پروگرام نا بشخ اسے۔ اوفرنٹ لین ہیلتھ ورکرآتے زبردست خراج تحسین پیش کرسا پارے کہ ہیلتھ کیئرورکرآتا عزم و ہمت کورونا تون مون تننگ اٹ کمک فراوان کننگ ءِ۔ اوپارے کہ ہیلتھ کیئرورکرآتا رکھ اکن پاکستان نا گام گیج آتا مچ آ دنیا ٹی ستاءِ کننگ انگ ءِ و داہیت ارے کہ کچ اٹنگا وسیلہ غاتیان پد ہم حکومت ہیلتھ کیئر ورکرآتا رکھ ءِ اولیت تس۔ اوپارے کہ ’’وی کیئر‘‘ نا رداٹ مچ آ ملک اٹی اسہ لکھ آن زیات ہیلتھ ورکرآتے رکھی گڑاتا سہی کاریم اٹ اتنگ نا بارواٹ خصوصی تربیت تننگ انگ ءِ و جہانی کہول آ پاکستان نا داگام گیج انا ستاءِ کننگ انگ ءِ۔ اوپارے کہ وی کیئر نا رداٹ ہر چار آ صوبہ، بنجائی دارالحکومت، گلگت بلتستان و آزاد جموں کشمیر اٹی داتم اسکان 60 ہزار آن زیات ورکرآتے تربیت تننگانے۔ وزیر جان جوڑی الس آن ہم خواست کرے کہ او رکھی گام گیج اختیار کرسا تینا دوست آتون فرنٹ لین ہیلتھ ورکرآتا رکھ ءِ پک کیر۔ اوپارے کہ بھلاعئید انا وخت آ شاریک پڑی تا بابت جاری کروک آ رکھی گام گیج آتیا عملدرآمدءِ پک کیر و عئید انا دے آ ہم عئید گاہ تیٹی ماسک انا کاریم اٹ اتنگ و اسہ ایلو آن شش فٹ انا فاصلہ ءِ برجاتخر تانکہ کورونا نا تالانی ءِ توننگ مرے۔ ڈاکٹر ظفرمرزا پارے کہ الس نا کمک ورکھی گام گیج آتیا سختی اٹ عمل کورونا ءِ چٹفنگ نا سوب مریک۔
