مزن وزیر ءَ زمین چنڈ ءَ چہ آماچیں دمگاں الس آناں ھمک رنگ ءِ کمک ءُ ریلیف پجارینگ ءِ واستہ دستیابیں ھمک وسیلگ آناں کارمرد کنگ ءِ پرمان داتگ

اسلام آباد۔15اگست  (اے پی پی): مزن وزیر محمد شہباز شریف ءَ این ڈی ایم اے ءَ را ہدایت کتگ کہ آ سیادی داروکیں صوبائی ادارگ ءُ پی ڈی ایم اے ءِ گوما جوانیں رنگ ءَ ہمگام بہ بیت ءُ زمین چنڈ ءَ چہ آماچیں دمگ آنی مردم آناں ہر وڑیں کمک ءُ ریلیف ءِ واستہ درستیں دستیابیں وسیلگ آناں کارمرد بہ کنت۔ این ڈی ایم اے ءِ چیئرمین لیفٹیننٹ جنرل انعام حیدر ملک  ءَ شمبے ءِ روچ ءَ مزن وزیر محمد شہباز شریف ءَ گوں گند ءُ نند کت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ نیشنل ایمرجنسی آپریشن سینٹر ءِ نیمگ ءَ اے آئی ءُ نوکیں ٹیکنالوجی ءِ کارمردی ءِ ساڑاتگ ءِ وھد ءَ ہدایت کتگ کہ دستیابیں وسیلگ آناں زمین چنڈ ءَ چہ آماچیں دمگ آنی تہ ءَ الس آناں ھرچ وڑیں کمک ءُ ریلیف ءِ پجارینگ ءِ واستہ کارمرد کنگ بہ بیت۔ مزن وزیر ءَ این ڈی ایم اے ءَ را ھم ہدایت کت کہ آ سیادی داروکیں صوبائی ادارگ ءُ پی ڈی ایم اے آنی گوما جوانیں رابطہ کاری ءَ را برجاہ بہ دار ایت۔ چیئرمین این ڈی ایم اے ءَ مزن وزیر ءَ را ملک ءِ موسمی جاورھال ھاسیں رنگ ءَ مون سون ءِ ھور ءِ رد ءَ زمین چنڈ ءِ جاور ھال آنی بابت ءَ سرپد کت۔ آئی ءَ مزن وزیر ءَ را زمین چنڈ ءَ چہ آماچیں دمگ آنی تہ ءَ کمکی کار آنی بابت ءَ ھم سرپد کت ءُ آماچیں مردم آناں بحالی ءِ واستہ چست کنگ بوھوکیں گامگیج آنی بابت ءَ ھم سرپد کت۔ آئی ءَ گوشت کہ وفاقی حکومت ءِ کمک ءَ گوں خیبر پختونخوا، گلگت بلتستان ءُ آزاد کشمیر ءِ این ڈی ایم اے زمین چنڈ ءَ چہ آماچیں دمگ آنی تہ ءَ کمکی کار آناں برجاہ دار ایت۔