ملک انا نہادی میرات و ملکی شونداری ٹی اہم کڑد اناسوب آن وزیراعظم عمران خان نا خاص پارت آتیا ورناتے کسبکار و مہارت یافتہ کننگ کن گام گیج کننگ انگ ءِ
اسلام آباد۔ 15 جولائی (اے پی پی) وزیراعظم نا خصوصی کمکار عثمان ڈار پارینے کہ ساڑی آ دور اٹی صنعتی شونداری کن کسبکار افرادی قوت خاص کر ورناتا پاکستان کن بھلو اہمیت اسے، ملک انا نہادی میرات و ملکی شونداری ٹی اہم کڑد انا سوب آن وزیراعظم عمران خان نا خاص پارت آتیا ورناتے کسبکار و مہارت یافتہ جوڑ کننگ کن گام گیج کننگ انگ ءِ۔ داخیال آتا درشانی ءِ او چارشنبے نادے آ یوتھ اسکلز نا جہانی دے انا وخت آ تینا کلہو اٹی کرے۔ عثمان ڈار پارے کہ ملک انا نہادی میرات و ملکی شونداری ٹی اہم کڑد انا سوب آن وزیراعظم عمران خان نا خاص پارت آتیا ورناتے کسبکار و مہارت یافتہ جوڑ کننگ کن گام گیج کننگ انگ ءِ۔ دا رداٹ تینا وڑنا یکتا پروگرام کسبکار پاکستان نا بناءِ کننگا۔ دا پروگرام اٹی اولیکو وار اسہ لکھ ورناتیکن زیات طلب والا کورس مشین لرننگ، مصنوعتی ذہانت، انٹرنیٹ، ویب انا تیاری و ایپلی کیشن تا تیاری پین پین اٹی بے معاوضہ تربیت نا بست وبند کننگانے تانکہ ننا ورناک ملکی و جہانی کہول آ تینا لائخی تے کاریم اٹ اتسا گچین روزگار نا وارخواہی دوئی کننگ کیر۔ اوپارے کہ پاکستان نا ورناک! ساڑی آ دور اٹی صنعتی شونداری کن کسبکار افرادی قوت نا بھلو اہمیت اسے۔ ہندا گرج و اہمیت ءِ مون آ تخسا ساڑی حکومت ٹیکنیکل و کسبی بشخ انا شونداری کن خاص کر ورناک وخت اس کہ عمومی وڑاٹ’’کسبکاری غٹ اکن‘‘ نا حکمت عملی اس ٹہیفے، ہرانا رداٹ ہیلکاری ہند آتیٹی پوسکن آ ازباب آتا فراوانی وانڈسٹری نا کمک اٹ ہیلکاری نصاب آتا اول سرآن ٹہیفنگ، استاد آتا جہانی کہول آ تربیت، ہیلکاری ادارہ غاتا جہانی ادارہ غاتیان سرٹیفکیشن و مدرسہ غاتیٹی دینی تعلیم تون ٹیکنیکل تعلیم و تربیت نا بست وبند ءِ کننگانے۔ داکان بیدس ورناتے پیشن نا ملک روزگار کن تیار کننگ و اوفتے ملازمت آتا دوئی کننگ اٹ کمک نا فراوانی کن مچ آ ملک اٹی آسراتی تا بنجاتا بناءِ کننگ انگ ءِ، ہراڑآن کسبکار ورناک نئے بیرہ پیشن نا ملک آتیٹی ملازمت دوئی کننگ کیرہ بلکن ملکی زرمبادلہ ٹی ودکی نا سوب ہم مریرہ۔ ای ورناتتون وزیراعظم عمران خان نا سرسہب ورناپروگرام اٹی اوار مرسا تینے پوسکن آ چاہنداری و کسبکاری آن شپ کننگ نا اومیت کیوہ و ای پراومیت اُٹ کہ مہارت یافتہ ورناک پاکستان نا شونداری و شونہالی و اقتصادی سوگوی ٹی اہم ءُ کڑداس ادا کیرہ۔
