نیشنل کمانڈ اینڈ آپریشن سینٹر نا پِڑی تیٹی آب اٹ آپریٹنگ نا وڑوڈول و رکھی گام گیج آتا عمل ءِ پک کننگ نا پارت
اسلام آباد۔ 15 جولائی (اے پی پی) نیشنل کمانڈ اینڈ آپریشن سینٹر(این سی او سی) صوبہ و ایلو اسٹیک ہولڈر آتے پارت جاری کرینے کہ او پِڑی تیٹی آب اٹ آپریٹنگ نا وڑوڈول ایس او پی و رکھی گام گیج آتیا عملدرآمد ءِ پک کیر تانکہ کوروناوائرس نا تالانی ءِ توننگ مرے۔ بنجائی وزیر ڈٹ بندی، شونداری و خصوصی گام گیج اسد عمر نا کماشی ٹی این سی او سی دیوان اٹی ماڈل پِڑی (مارکیٹ) و ایس او پی تیا عملدرآمدنا بابت باندات آتیا گپ وتران کننگا۔ داوخت آ تران کرسا اسد عمر پِڑی تیٹی کورونا وائرس نا تالان مننگ نا گمانی خطرہ غاتے کم کننگ کن ایس او پی تیا عملدرآمد کن سخت انتظامی کارروائی آ زور شاغا۔ پِڑی تیٹی ماسک بیننگ آن بیدس ہچ کس پترینگپ وپولس کارندہ غاتے داڑآ سختی اٹ عملدرآمد کرفوئی مرے و پِڑی تا ہن و برنا کسر تا چاروکی ءِ کننگے۔ مخلوق ءِ ماسک تننگ کن پِڑی تیٹی پترینگوک آ کسرتیا ہم اسٹال خلنگے۔ سندھ انا چیف سیکرٹری دیوان ءِ پارے کہ بھلاعئید و محرم نا وخت آتیا دین انا تالان مننگ نا گڑتی نا مون ءِ توننگ اسہ بھاز بھلو چیلنج اس ئس ہراڑے این سی او سی نا کمک اٹ اسیجا ایس او پی تے ضلعی و ڈویژنل انتظامیہ ءِ معلومدار کننگاسس کہ او عملدرآمد کن حکمت عملی اس جوڑ کیر۔ پارت آتیا سختی اٹ عملدرآمد کننگ انگ ءِ۔ چیف سیکرٹری بلوچستان فورم ءِ پارے کہ کوئٹہ ٹی کم و ود 20 پِڑی جوڑ ءُ وخت اس کہ صوبہ نا چندی شار تیٹی 5-3مارکیٹ جوڑ کننگا۔ اوپارے کہ کوئٹہ ٹی ماڈل پڑی تا منڈی جوڑ کننگا و عملدرآمد نا است بڈی کن الس اٹ کم و ود 20 ہزار ماسک بشخنگا۔ چیف سیکرٹری پنجاب فورم ءِ پارے کہ 15-25جولائی اسکان صوبہ ٹی کم و ود 303 پِڑی جوڑ کننگک ہرافتا سلاہ ئی وخت سہب انا 9 بجہ غان بیگہ نا 6 بجہ اسکان مریک۔ خیبرپختونخوا نا چیف سیکرٹری پارے کہ صوبہ ٹی کل 191 پڑی جوڑ کننگک وخت اس کہ پترینگوک آ کسر تیا ماسک بشخوک ءُ اسٹال آتون اسٹ اس ہم بیدس ماسک آن منڈی ٹی پترینگپک۔ اومستی پارے کہ ضلعی انتظامیہ ءِ پارت کننگانے کہ ایس او پی تا نافذ کننگ آ سختی اٹ عملدرآمد کننگے۔ آزاد جموں و کشمیر (اے جے کے) چیف سیکرٹری فورم ءِ حوال اٹی پارے کہ اے جے کے ٹی پڑی تے 21آن ودفسا 47 کننگانے وخت اس کہ غٹ پِڑیک شارتیان پیشن خلقی آ علاقہ غاتیٹی مریرہ و سخت تعمیل ءِ پک کننگک۔ گلگت بلتستان نا چیف سیکرٹری پارے کہ گلگت اٹ اسہ ماڈل پِڑی اس جوڑ کننگانے۔ وخت اس کہ ماسک بشخوک آ اسٹال اتون اسٹ اس ہم بیدس ماسک آن پترینگ انگ کپک۔ فورم ءِ حوال تننگا کہ بنجا نا فیصلہ نا رداٹ جولائی نا ایسر اسکان مچ آ ملک انا ہسپتال آتیٹی 2 ہزار آکسیجن کٹ فراوان کننگ نا فیڈرل فیصلہ نا رداٹ ساڑی لائخی ٹی آکسیجن کٹ اوار کننگا۔ ریمپ اپ اٹ اسلام آباد کیپیٹل ٹیریٹری 550کٹ، پنجاب 480، سندھ 125، خیبر پختونخوا 390، بلوچستان 150، گلگت بلتستان 40 و اے جے کے 90 اوار ءُ۔
