ڈپٹی چیئرمین پلاننگ کمیشن محمد جہانزیب خان
اسلام آباد۔ 15جولائی (اے پی پی) ڈپٹی چیئرمین پلاننگ کمیشن محمد جہانزیب خان پارے کہ کوویڈ۔ 19 دَینی مرض ننے مچ آ ملک اٹی جان جوڑی نا آسراتی تا بحالی نا گرج آتا احساس ترفینے ، پروگرام کن جتا کروک 70 ارب روپئی نا کاریم اٹ اتنگ ءِ بنجائی و صوبائی حکومت آتا تیار کروک ڈٹ آتا کمک اٹ کننگک۔ داخیال آتا درشانی ءِ او چارشنبے نادے آ 70 ارب روپئی نا خڑچ انا ’’کوویڈ۔ 19 ریسپانسیوو ایلو قدرتی آفت آتون مون تننگ نا پروگرام ‘‘نا دیوان آن تران کرسا کرے۔ دیوان اٹی سیکرٹری پلاننگ مطہر نیاز رانا، باسک پلاننگ کمیشن، بنجائی و صوبائی ادارہ غاتا بڑزکو کمامدارآک بشخ ہلکر۔ ڈپٹی چیئرمین پلاننگ کمیشن پارے کہ داپروگرام نارداٹ جان جوڑی نا چاروکی و ناجوڑی تا پیدواری، ڈی ایچ کیو/ٹی ایچ کیو ہسپتال آتا اپ گریڈیشن آ چکار کننگ تون کنوئی ءُ ساف دیر ، پبی فضلہ نا بست و بند و ہندی بنداوی پنجر ءِ گچین کننگ نا جانچ نا آسراتی اوار ءِ، ڈٹ ءِ صوبائی و ہندی ایجنسی تتون شریداری ٹی لاگو کننگک تانکہ کوویڈ۔ 19 کون آ دینی مرض آتا اثرآتے کم کننگ مرے۔ محمد جہانزیب خان پارے کہ دا ڈٹ انا کل خڑچ آتیٹی 50 درسد بشخ صوبائی حکومت شاغک ہراڑآن دا ڈٹ انا کل مالیت 140 ارب روپئی مریک۔جان جوڑی نا نظام ءِ اپ گریڈ کننگ و ہندی زرگزران ءِ بحال کننگ کن داپروگرام بنجائی حکومت و صوبہ غاتا نیام اٹ اسہ گچین ءُ کمکاری اسے۔
