اسلام آباد۔ 15 جولائی (اے پی پی) کوروناوائرس نا دین اٹی روزگار نا رکھ اکن اسٹیٹ بینک نا اسکیم نا رداٹ داتم اسکان 11 لکھ، 83 ہزار، 242 ملازم آتا روزگار ءِ رکھ فراوان کننگانے۔ اسٹیٹ بینک کوروناوائرس نا سوب ودی مروک آ زرگزرانی مشکل و بے روزگاری ءِ توننگ کن دا اسکیم ءِ درستی راستی کرفینے، اسکیم نا رداٹ کاروباری ادارہ غاک آخبتی، کنٹریکٹ و دیہاڑی دار آتون اوار ہروڑنا ملازم و آوٹ سورس کارندہ غاتے تنخواہ تا ادائیگی کن اڑزآن وام دوئی کننگ کیرہ۔ اسکیم نا رداٹ اپریل 2020ء آن ستمبر 2020ء ٹی تینا ملازم آتے برطرف کپروک آ ادارہ ملازم آتا مسہ تُو انا تنخواہ تیکن 5 درسد شرح سود آ وام ہلنگ کیرہ، فعال خراج گزار آتا مہشون اٹ اوار ادارہ غاک 4 درسد نا کچ آ وام ہلنگ کیرہ۔ اسکیم اٹی ہموچنکا کاروباری ادارہ غاتے اولیت تننگ انگ ءِ ہرا کاروباری ادارہ غاتا مسہ تُو انا روزانہ و تنخواہ تا خڑچ 20 کروڑ روپئی اسکان ءِ، او دا مچ آ زر انا فنانسگ دوئی کننگ کیرہ۔ اسٹیٹ بینک انا کنڈآن جاری کروک حساب وکتاب نا رداٹ 26 جون اسکان دا اسکیم نا رداٹ 2486کاروباری ادارہ و کمپنیک 13 لکھ، 28 ہزار، 793 ملازم آتا روزگار نا رکھ اکن اسہ کھرب 43 ارب 37 کروڑ روپئی آن زیات نا وام اکن درخواست دائرکریر۔ حساب وکتاب نارداٹ اسٹیٹ بینک دافتیان 1817 ادارہ و کمپنی تا کنڈآن اسہ کھرب، 18 ارب32کروڑ42لکھ روپئی اسکان نا وام درخواست آتا منظوری ءِ تس و ہنداوڑ 11 لکھ 83 ہزار ملازم آتا روزگار ءِ رکھ فراوان کننگا۔
