اسلام آباد۔ 14 جولائی (اے پی پی) بنجائی وزیر حوالکاری و شینکاری سینیٹر شبلی فراز پارینے کہ بنجائی کابینہ نا دیوان اٹی گچین کاری اصلاحات، سرکاری ادارہ غاتیٹی سروک آتا تعیناتی، ہاؤسنگ بشخ اٹی اصلاحات و جان جوڑی نا بشخ اٹی نجی بشخ انا اواری اٹ ہسپتال آتا جوڑ کننگ کون آ اہم ایجنڈاآئٹم تیا سجفنگا۔ وزیراعظم صوبہ غاتے پارت کرینے کہ دمدستی وڑاٹ صوبائی فنانس کمیشن اس جوڑ کیر تانکہ پدسلوک آ علاقہ غاتیٹی وسیلہ غاتا اسہ وڑ بشخنگ ممکن مننگ کے۔ بنجائی کابینہ نا داتم اسکان 93 دیوان تیٹی 1759فیصلہ کننگا ہرافتے ٹی 1579 آ عملدرآمد نا بنامسنے، 28 فیصلہ غاتیا عملدرآمد اٹی تاخیر ءِ وخت اس کہ 46 فیصلہ غاتیا عملدرآمد آ عمل مننگ ءِ۔ کے الیکٹرک نا بابت فیصلہ بنجائی کابینہ نا بروک آ دیوان اٹی مریک وخت اس کہ بنجائی وزیر سینیٹر اعظم سواتی نا کماشی ٹی گچین کاری اصلاحات کمیٹی نا سلاہ و سوج آک حتمی مرحلہ غاتیٹی پترینگانو ہرافتے بنجائی کابینہ نا بروک آ دیوان اٹی پیش کننگ۔ یوریا، آرایل این جی، نیشنل ٹیلی کمیونیکیشن نا ایڈجسٹمنٹ تون اوار ایلو اہم فیصلہ غاتے ہم دیوان اٹ کننگا۔ سرکاری ملازم آتا پنشن و حج انا بابت خصوصی فنڈ انا قیام آ سجفنگ انگ ءِ۔ داخیال آتا درشانی ءِ او وزیراعظم عمران خان نا کماشی ٹی سے شنبے نادے آ مروک آ بنجائی کابینہ نا دیوان آن پد میڈیا ءِ حوال اٹی کرے۔ وزیر حوالکاری و شینکاری پارے کہ وزیراعظم عمران خان قومی اسمبلی و سینیٹ نا بروک آ گچین کاری تے شفاف کننگ کن سنبرینگوک ءِ ، کابینہ نا دیوان اٹی اعظم سواتی نا کماشی ٹی جوڑ کروک آ کمیٹی نا سلاہ تیا ہم سجفنگا۔ کمیٹی نا سلاہ و سوج آک حتمی مرحلہ غاتیٹی پترینگانو، ہرافتے کابینہ نا بروک آ دیوان اٹ پیش کننگک۔ سینیٹر شبلی فراز پارے کہ کابینہ نا دیوان اٹی سرکاری ادارہ غاتیٹی سروک آتا تعیناتی نا باندات آہم سجفنگا، مستین اٹی دا بابت بھلو بے ڈولی مرسا ہنانےو دا اسہ بھاز بھلو چیلنج اسے۔ اوپارے کہ حکومت اصلاحات آتا مینڈیٹ اتون اقتدار اٹی بسنے انتئے کہ اصلاحات کننگ آسان ءُ کاریم اس مفک داٹی اڑاند ہم مون آ بریک، ولے ننا کوشست ءِ کہ ہندن ءُ اصلاحات کننگے کہ پین وخت اس بے وڑی مننگ کپ۔ اوپارے کہ ڈاکٹر عشرت حسین نا کماشی ٹی کمیٹی داڑآ کاریم ہم کننگ ءِ و وزیراعظم پارت ہم کرینے کہ دا بابت جامع نظام اس ٹہیفنگے۔ کابینہ نا دیوان اٹی عصمت خٹک ءِ نیشنل ایکریڈیشن کونسل نا سروک نا حیثیت اٹ تعیناتی نا منظوری ءِ تننگا۔ وزیر حوالکاری پارے کہ بنجائی کابینہ نا داتم اسکان 93 دیوان آتیٹی 1759 فیصلہ کننگا ہرافتے ٹی 1579 ا عملدرآمد بناکرینے، 28 فیصلہ غاتیا عملدرآمد اٹ تاخیر ءِ ہرانا سوب آتیا ہم سجفنگا وخت اس کہ 46 فیصلہ غاتیا عملدرآمد زیر عمل ءِ۔ جان جوڑی نا بشخ اٹی اصلاحات نا بابت وزیر حوالکاری پارے کہ ننا حکومت چندی پیکج آتیا سجفنگ ءِ انتئے کہ غٹ ہسپتال آتے حکومت تنیا جوڑ کننگ کپک داڑکن سرکاری ڈغارتیا نجی بشخ انا اواری اٹ ہسپتال جوڑ کننگ نا باندات آہم ہیت وگپ مسنے۔ کابینہ نا دیوان اٹی سرکاری حج انا باندات و پنشن فنڈ انا باندات آتیا ہم سجفنگا۔ سرکاری حج انا بابت ملائیشیا نا اسہ ماڈل اسے سجفنگا ولے داٹی ساڑی خامی تے مُر کرسا حج باندات آتا تعین کننگک۔ پنشن نا باندات آتیکن اسہ فنڈ اس جوڑ کننگ آ سجفنگ انگ ءِ تانکہ دا عمل ءِ رکھ کننگ مرے انتئے کہ ادارہ غاتون پنشن نا پیسہ مفک و کاغد آتیٹی ظاہر کننگرہ دا گام گیج آن دا عمل شفاف مریک۔ قطبی علاقہ غاتیٹی درخت آتا کاٹ کننگ ءِ توننگ کن شمسی توانائی آن چلینگوک آ چولہا بشخنگ نا اسکیم نا پڑو ءِ کننگانے۔ اوپارے کہ کابینہ نا دیوان اٹی وزیراعظم غٹ سفارتخانہ غاتے پارت کرینے کہ بندی تے کانودی کمک نا فراوانی و کوویڈ۔ 19 نا ساڑی حالیت آتا رداٹ دابندی تا واپسی کن تعلقدار حکومت آتون ہیت وگپ نا عمل ءِ ترند کننگے۔وزیر حوالکاری و شینکاری پارے کہ یوریا، آرایل این جی، نیشنل ٹیلی کمیونیکیشن و ایلو ادارہ غاتا ایڈجسٹمنٹ نا بابت ہم دیوان اٹٛ اہم ءُ فیصلہ کننگانے، کے الیکٹرک نا فیصلہ ءِ بنجائی کابینہ نا بروک آ دیوان اٹ کننگک۔ وزیرحوالکاری پارے کہ نیشنل فنانس کمیشن ہم اسہ اہم ءُ باندات اسے ہرا کابینہ نا دیوان نا ایجنڈاغائس، دا بابت صوبہ غاتا فنڈ انا فارمولہ غاسجفنگا و وزیراعظم صوبہ غاتے پارت کرینے کہ او دمدستی تینا صوبائی فنانس کمیشن اس جوڑکیر، بنجائی وزیر ڈٹ بندی، شونداری و اصلاحات اسد عمر بنجاٹی فنانس کمیشن نا باندات آتا چاروکی ءِ کیک۔
