اسلام آباد۔ 14 جولائی (اے پی پی) وزیراعظم نا خصوصی کمکار راجی رکھ و تخفیف نیزگاری ڈاکٹر ثانیہ نشتر احساس نا پوسکن آ پروگرام ’’احساس نشوونما‘‘ نا بابت وزیراعظم عمران خان ءِ تدوک آ دے حوال تس۔ وزیراعظم عمران خان بروک آ منہ ہفتہ ٹی ’’احساس نشوونما‘‘پروگرام نا بناءِ کیک۔ احساس نشوونما پروگرام نا رداٹ ملک انا 9 ضلع غاتے ٹی 31 نشوونما ہند جوڑ کننگک۔ چناتا جوان رُدنگ اٹ اڑاند آتا چٹفنگ کن خصوصی وڑاٹ ڈیزین کروک دا پروگرام اٹ حکومت پاکستان ءِ جہانی ادارہ خور انا کمک دوئی ءِ۔ ترجمان نا رداٹ احساس ایمرجنسی کیش پروگرام برجاءِ و داتم اسکان مچ آ ملک اٹی اسہ کروڑ 26 لکھ 47 ہزار آن زیات بندغ اٹ احساس ایمرجنسی کیش پروگرام نا رداٹ زر بشخنگانے۔ حقدار بندغ آتے ٹی داتم اسکان 153 ارب 5 کروڑ روپئی آن زیات زر بشخنگانے۔ پنجاب اٹی 57لکھ 29 ہزار آن زیات بندغ آتے ٹی 69 ارب 34 کروڑ روپئی بشخنگانے۔ بلوچستان اٹی 7 ارب 71 کروڑ روپئی، 6لکھ 35 ہزار آن زیات بندغ آتے ٹی و خیبر پختونخوا ٹی 21 لکھ 57 ہزار آن زیات بندغ آتے ٹی 26 ارب 19 کروڑ روپئی بشخنگانے۔ سندھ اٹی 45 ارب 38 کروڑ روپئی، 37 لکھ 63 ہزار آن زیات بندغ آتے ٹی بشخنگانے۔ آزاد کشمیر اٹی 2لکھ 5 ہزار آن زیات بندغ آتے ٹی 2 ارب 51 کروڑ روپئی بشخنگانے۔ گلگت بلتستان اٹی 90 ہزار آن زیات بندغ آتے ٹی 1 ارب 10 کروڑ روپئی آن زیات زر بشخنگانے۔ اسلام آباد اٹی 80 کروڑ روپئی آن زیات زر 66 ہزار آن زیات بندغ آتے ٹی بشخنگانے۔
