اسلام آباد۔ 14 جولائی (اے پی پی) بلوچستان حکومت اینخو مالی سال 2020-21ء نا سرکاری بشخ انا شونداری پروگرام اٹی کشاری بشخ انا شونداری کن 4 ارب 1 کروڑ 21 لکھ روپئی جتا کرینے۔ بلوچستان حکومت شعبہ کشت وکشار نا کمامدارآتارداٹ حکومت غیر شونداری بشخ اکن، 11 ارب 71 لکھ روپئی جتا کرینے، وخت اس کہ صوبہ ٹی محکمہ کشت وکشار نا بحالی کن 775،640 ملین روپئی تخنگانے۔ بلوچستان حکومت مالی سال 2019-20ء ٹی کشاری پیداوار نا گچینی کن مچ آ صوبہ نا زمیندار و کشار گر آتیٹی 31445کلوگرام کشاری بِج، 5229کشاری اوزار و 7387روئی نا تھیلہ بشخاسس۔ ملخ آتا جلہو آتیان ہم کشاری پیداوار اٹی نمان کمتی واقع مسنے، ہراڑکن دسمبر 2019ء ٹی صوبائی حکومت ملخ ایمرجنسی نا پڑو ءِ کننگاسس۔ ملخ آتا گڑتی تا رداٹ، محکمہ کشت وکشار دافتا توننگ کن 181 ٹیم جوڑ کریسس و بروک آ مالی سال 2020-21ء ٹی اسپرے کننگ و ملخ آتا گڑتی تا مون ءِ توننگ کن ایلو بنداوی گام گیج کننگ کن 500 ملین روپئی تخانے۔ وخت اس کہ مالی سال 2019-20ء ٹی ، دارداٹ 404 ملین روپئی نا زر جاری کننگاسس۔ صوبہ نا کشاری پیداوار ءِ جہانی منڈی تسکان رسینگ تننگ کن، اینخو مالی سال 2020-21ء ٹی اسہ کشاری ایکسپو اسے نا بست وبند کننگک۔ صوبہ ٹی پوسکن آ کشارگری ءِ مون آ دننگ کن، 11 ضلع غاتیٹی 85 ٹیوب ویل کشاری فارم آتے کشاری پیدوار اٹی ودکی کننگ کن شمسی توانائی تون گنڈنگانے۔ اینخو مالی سال 2020-21ء ٹی حکومت میرانی ڈیم کمانڈ ایریا فیز 2، سبکزئی ڈیم فیزIII، کچی کینال کمانڈ ایریا ءِ شون تننگ نا گام گیج آتیا سجفنگ ءِ ہراڑآن لکھ آ ایکڑ بارُن انگا ڈغار تے دسنگ اٹ کمک رسینگک۔ اینخو مالی سال 2020-21ء ٹی، صوبہ ٹی کشارگرآتے کھد آ سبسڈی تننگ کن 24 ملین روپئی جتا کننگانے۔ ساڑی حکومت کشاری کارندہ و پیدوار نا بشخ انا تکنیکی عملہ نا لائخی تیٹی ودکی کن فنڈ پک کننگ نا فیصلہ ءِ کرینے۔ محکمہ کشت وکشار اٹی غٹ ضلعی و ڈویژنل آفیسر آتے اسہ ہزار فیلڈ اسٹنٹس، گاڈی و موٹرسائیکل نا فراوانی کن حکومت بلوچستان بجٹ 2020-21ء ٹی فنڈ جتا کرینے۔ اینخو مالی سال اٹی قلعہ سیف اللہ و قلات ضلع غاتیٹی کولڈ اسٹوریج نا جوڑ کننگ کن 100 ملین روپئی جتا کننگانے۔ اینخومالی سال 2020-21ء ٹی کشت وکشار نا بشخ اکن 263 پوسکن ءُ پوسٹ ٹہیفنگا۔
