دین انا اثرآتے کم کننگ کن پاکستان اٹی راجی رکھ انا پروگرام اہم ءُ کڑد اس ادا کننگ ءِ، جہانی بینک

احساس پروگرام سویلی ایشیاء نا ڈیہہ ٹی راجی رکھ انا غٹ آن بھلا پروگرام مسنے
اسلام آباد۔ 14 جولائی (اے پی پی) جہانی بینک پارینے کہ کوروناوائرس نا دین انا اثرآتے کم کننگ کن پاکستان اٹی راجی رکھ انا پروگرام اہم ءُ کڑد اس ادا کننگ ءِ۔ داہیت ءِ پاکستان اٹی جہانی بینک انا کنٹری ڈائریکٹر الانگوپیچوموتو سے شنبے نادے آ راجی رابطہ نا ویب سائٹ ٹویٹر آ جاری کلہو و منسلکہ آرٹیکل اٹ پارینے۔ اوپارے کہ پاکستان وائرس تون مون تننگ کن ہرا گام گیج آتے کرے اوفتے ٹی راجی رکھ انا دنگ اٹ ودکی و اودے سوگو کننگ اوار ئس ہراٹی جہانی بینک پاکستان ءِ کمک فراوان کرینے۔ اوپارے کہ پاکستان نا 21 کروڑ آبادی آن 24 درسد نیزگاری نا گواچی ءُ و اوفتا حالیت آتے پین خراب مننگ آن بچفنگ کن دمدستی گام گیج آتا گرج ئس۔ دا دین آن زالبول، ہرا لیبر فورس اٹی مست آن کم فائدہ دوئی کروک آتیٹی اوار ئسر، ءِ زیات گڑتی تا گواچی کرینے۔ اوپارے کہ پاکستان دین انا اثرآتون مون تننگ کن راجی رکھ انا تینا فلیگ شپ احساس پروگرام ءِ پین گچین کرے و داٹی پین 72 لکھ آن زیات نزور و نیزگار خاہوت آتے اوار کرے ہرافتے بائیو میٹرک وڑوڈول انا رداٹ فی خاہوت 12 ہزار روپئی تننگا۔ پاکستان کن نیزگار و نزور تپہ غاتے دمدستی وڑاٹ کمک فراوان کننگ داخاطرآن ممکن مننگ کرے انتئے کہ او بے نظیر انکم سپورٹ پروگرام و احساس کفالت کون آ راجی رکھ انا پروگرام تیٹی زیات زرکاری نا ئس و داپروگرام سویلی ایشیاء نا ڈیہہ ٹی راجی رکھ انا غٹ آن بھلا پروگرام مسنے۔ دا پروگرام دین انا دے تیٹی ایلو ملک آتے کن اسہ جوان ءُ مثال اسے۔