اسلام آباد۔ 14 جولائی (اے پی پی) پاکستان آذربائیجان نا ضلع توزو آ آرمینیائی فوج انا جلہو نا ترندی اٹ مذمت ءِ کرینے ہراٹی چندی آذری زوال کرینو۔ سے شنبے نادے آ ترجمان دفترخارجہ 12 جولائی آ آذربائیجان نا ضلع توزو آ آرمینیائی فوج انا جلہو نا ترندی اٹ مذمت ءِ کرسا جلہو اٹی زوال کروک آتا پدسلوک خاہوت آتون ہڑزخواہی کرینے۔ ترجمان پارے کہ ناگورنوکاراباخ انا ایسر نا چاری جھیڑہ دوررس بھرم آتون علاقائی امن و سلامتی کن بھلو گڑتی اسے۔ ترجمان پارے کہ آرمینیا نا کنڈآن ساڑی آ خارتس کارروائی اقوام متحدہ نا سلامتی کونسل نا قرارداد آتا رداٹ ناگورنو۔کاراباخ جھیڑہ نا غرض اٹ جاری مذاکراتی عمل ءِ توننگ و جہانی برادری نا چکار ءِ اسہ کنڈ کننگ نا کوشست آتا درشانی ءِ۔ ترجمان پارے کہ پاکستان ناگورنو۔کاراباخ جھیڑہ غا تینا اصولی موقف آ سلوک ءِ و جمہوریہ آذربائیجان نا وتواجہی و علاقائی سالمیت کن تینا مخ تفی نا درشانی ءِ کیک۔
