اسلام آباد۔ 14 جولائی (اے پی پی) وزیرخارجہ مخدوم شاہ محمود قریشی پارینے کہ احتساب آن بیدس ساف سیاسی سرکڑدہ نا مون آ بننگ ناممکن ءِ ۔ سے شنبے نادے آ ہسپتال آن اُراغا ہِننگ آ تینا اسہ بیان اسے ٹی وزیر خارجہ پارے کہ ای اللہ تعالیٰ نا بے حد شکر ءِ ادا کیوہ ہراکنے دراخ جوڑ کرے۔ کنا غٹ ہم وطن آتیان خواست مریک کہ خلیپس رکھی گام گیج اختیار کیر و اگہ علامت محسوس مرے تو ہُرے کپس، دمدستی وڑاٹ طبی چاہندار آتون رابطہ کیر، کنے ہراتم بنائی وڑاٹ علامت محسوس مس تو ای رکھ انا وڑاٹ غٹ اوڑدہی و دیوان آتے منسوخ کریٹ تانکہ کناسوب آن پین کس اس دا مرض انا گواچی مف۔ دمدستی وڑاٹ ٹیسٹ مننگ نا سوب و زوت درمان نا بنا مننگ نا سوب آن کنا طب پدریسہ سہی مرساہنا، کنے پلازمہ ہم انجیکٹ کننگا۔ وزیر خارجہ غٹ ڈاکٹر و پیرامیڈیکل اسٹاف ہراداکورونادین انا برخلاف جک سلوک ءُ ودے و نن ناجوڑ آتا خیالداری ٹی اختہ ءُ اوفتا عظمت ءِ امنا کرسا اوفتے سلام پیش کرینے۔ اوپارے کہ ای الحمداللہ اُراغا ہنانٹ و تینے بھاز جوان تکنگ اُٹ کنا دُوارہ ٹیسٹ ءِ ہلنگانے ہراانشاء اللہ درست مریک۔ سپریم کورٹ انا کنڈآن شوگرمل مالک آتا برخلاف کارروائی کننگ نا موکل نا بابت اوپارے کہ احتساب آن بیدس ساف سیاسی سرکڑدہ نا مون آ بننگ ناممکن ءِ۔ وخت بسنے کہ نن بے سوب لتاڑنگ ءِ بند کین و اصلی ڈوہدار تے مون آ اتین تانکہ اوپاش مریر۔ اودراخ جوڑی کن خیر خواہی و دعاتا کلہو مون تننگ آ غٹ آتا منت واری ءِ ہرفینے۔
