بلوچستان اٹی کوروناوائرس نا بابت ہسپتال آتا کاریم نا کچ اٹی ودکی کرینن وخت اس کہ آخبت اٹ ہم صوبہ ٹی جان جوڑی نا بشخ انا گرج آتے پورو کننگ نا غٹ گمانی وسیلہ غاتے کاریم اٹ اتنگ اُن، چیئرمین نیشنل ڈیزاسٹرمینجمنٹ اتھارٹی لیفٹیننٹ جنرل محمد افضل

کوئٹہ۔ 14 جولائی (اے پی پی) چیئرمین نیشنل ڈیزاسٹرمینجمنٹ اتھارٹی لیفٹیننٹ جنرل محمد افضل پارینے کہ بلوچستان اٹی کوروناوائرس نا بابت ہسپتال آتا کاریم نا کچ اٹی ودکی کرینن وخت اس کہ آخبت اٹ ہم صوبہ ٹی جان جوڑی نا بشخ انا گرج آتے پورو کننگ نا غٹ گمانی وسیلہ غاتے کاریم اٹ اتنگ انگ ءِ، داخیال آتا درشانی ءِ او کوئٹہ ٹی فاطمہ جناح چیسٹ اینڈ جنرل ہسپتال و بولان میڈیکل کمپلیکس کوئٹہ نا دورہ ءِ کننگ آن پد صحافی تتون گپ وتران کرسا کرے۔ چیئرمین نیشنل ڈیزاسٹرمینجمنٹ اتھارٹی لیفٹیننٹ جنرل محمد افضل پارے کہ حکومت نا وخت آ گام گیج آتیان کورونا نا حالیت آتا مون توروک ءِ، ڈاکٹر، طبی عملہ و تعلقدار ادارہ غاتا کارندہ غاک کورونا ٹی فرنٹ لین سولجر نا کڑد ءِ جوان وڑاٹ ادا کننگ ءُ ہرافتیا ننے غٹ ءِ گمر ءِ ، ہسپتال آتیٹی رکھی گڑاتا فراوانی ءِ پک کننگ اُن۔ بلوچستان نا ہسپتال آتیٹی ودکی کٹ آتون ایلو آسراتی تے ہم فراوان کننگ اُن۔ اوپارے کہ نن اومیت کینہ کہ مخلوق بھلاعئید آ ہم ایس او پی تاخیال ءِ تخک، اومستی پارے کہ ملخ کون آ چیلنج اتون ہم مون تننگ کن پبی گام گیج برجاءِ۔ داکان مست چیئرمین این ڈی ایم اے فاطمہ جناح چیسٹ اینڈ جنرل ہسپتال و بولان میڈیکل کمپلیکس کوئٹہ نا سرجم دورہ ءِ کرے و کوروناوائرس نا بابت بست وبند آتا جاچ ءِ ہلک و حکومت بلوچستان نا کوشست آتا ستاءِ کرے۔ ایم ایس بی ایم سی ڈاکٹر سلیم ابڑو اودے حوال تس اوکان پد چیئرمین نیشنل ڈیزاسٹرمینجمنٹ اتھارٹی کوئٹہ ٹی فاطمہ جناح ہسپتال نا ہم دورہءِ کرے۔