وزیراعظم عمران خان نا تعمیراتی صنعت کن بھلا پیکج اومیت نا روشنائی ءِ، ملکی زرگزران شون ہلیک و روزگار نا پوسکن ءُ وارخواہی ودی مریک، افتخار علی ملک

اسلام آباد۔ 13 جولائی (اے پی پی) سارک چیمبر آف کامرس نا صدر افتخار علی ملک پارینے کہ وزیراعظم عمران خان نا تعمیراتی صنعت کن بھلا پیکج اومیت نا روشنائی ءِ و ہندن ءُ وخت اسے ٹی ہراتم ملکی صنعت ءِ کورونا وائرس نا بدترین زہم آتون مون تروک ءِ داڑآن ملکی زرگزران شون ہلیک و روزگار نا پوسکن ءُ وارخواہی ودی مریک۔ وزیراعظم نا آسودہی پیکج نا ستا ءِ کرسا صدر سارک چیمبر افتخار علی ملک پارے کہ تعمیراتی بشخ اٹی زرگزرانی سرجزآتیٹی ودکی نا بھلو لائخی اسےولے اسٹیٹ بینک انا آخیریکو سہ ماہی رپورٹ نا رداٹ گڑاس گام گیج آتا سوب تدوک آ سال دا بشخ اٹی 7.6 درسد کمتی بس ہرانا سوب آن زرگزران ءِ بھلو نسخان اسے نا مون تروئی تما۔ پیکج ءِ مون آ تخسا اوپارے کہ داڑآن زرگزرانی سرجزآتے مون آ دننگ رسینگک و دا زرکار و کاروباری برادری نا پت ءِ بحال کننگ اٹ ہم کمکار مریک۔ اوپارے کہ داپیکج نا اہم انگا ٹک دادے کہ تعمیراتی بشخ اٹی زرکاری آ ہچ کس آن کٹیا نا ذریعہ نا بابت ہریفنگپک، داڑآن مخلوق ءِ تینا مون انگا دھن زرگزرانی سرجزآتیٹی اتنگ نا ترغیب ملک۔ افتخار ملک مستی پارے کہ پوسکن آ پاکستان ہاؤسنگ اسکیم ءِ 30ارب روپئی نا سبسڈی تننگ نا وزیراعظم عمران خان نا پڑوستاکڑزک و داڑآن تعمیراتی صنعت ءِ سوگوی ملک۔ اوپارے کہ داوخت آ پاکستان اٹی بیست لکھ آن زیات ہند آتا کمتی ءِ وخت اس کہ تعمیراتی صنعت نا کچ 250 ارب روپئی آن زیات ءِ، دا پڑوآن دا بشخ ءِ ہند آتا خلاء ءِ پورو کننگ و روزگار نا وارخواہی ودی کننگ اٹ کمک رسینگک۔ اوپارے کہ داہم ستاکڑزک کہ حکومت تعمیراتی بشخ ءِ صںعت نا درجہ تسنے ہراڑآن دادے دستیاب آسراتی تیٹی ودکی مریک۔ اوپارے کہ چندی ایلو صنعت آتا نمو تعمیراتی بشخ انا نموتون گنڈوک ءِ و داسازگار پالیسی تیان غٹ گنڈوک آ صنعت آتا رُدفنگ اٹ کمک رسینگک و دا زرگزران ءِ سوگو کننگ اٹ نمان کڑد ادا کیک۔ اوپارے کہ تعمیراتی صنعت نا خام مال ءِ ملک انا تہہ ٹی بایدے جوڑ کننگے و حکومت تعمیراتی و ہاؤسنگ سیکٹر کن خام مال نا درآمد نا حوصلہ شکنی ءِ کے، داکان بیدس تعمیراتی بشخ اٹی زرکاری ٹی است خواہی تخوک آ درملکی زرکارو کاروباری بندغ آتے ہم غٹ آسراتی تے فراوان کروئی مریک۔ افتخار علی ملک پارے کہ وزیراعظم عمران خان دامشکل وخت اٹی اسہ بھلو لیڈراسے نا وڑاٹ مون آ بسنے ہراکہ مچ آ دنیا ٹی کورونا نا سوب آن زرگزران تون اوار زند انا ہر بشخ بھاز بے وڑ زہمی مسنے۔ کاروباری برادری کن آسودہی پیکج و الس کن ریلیف پیکج آن پاش مریک کہ وزیراعظم عمران خان اسہ ویژنری لیڈر اسے ہرا راج انا نزور تپہ غاتا کمک ءِ کننگ آن بیدس پاکستان ءِ زرگزرانی وڑاٹ آجو کننگ خواہک۔ او بے اُرا مخلوق آ زور شاغاکہ او دا پیکج آن فائدہ ہرفر و کم انگا شرح سود و سبسڈی اٹ تینا ہند آتے تفر ایلو دروشم اٹ او مچ آ زند پشیمان مریرہ۔