اسلام آباد۔ 09 جولائی (اے پی پی) بنجائی وزیر تعلیم و کسبی تربیت شفقت محمود پارینے کہ مچ آ ملک اٹی غٹ تعلیمی ادارہ غاتے 15 ستمبر آ ملنگک، جولائی نا ارٹ میکو ہفتہ آن ایس او پی تا رداٹ فنی تعلیم و مدرسہ غاتے امتحان ہلنگ نا موکل مریک۔ عئید آن پد یونیورسٹی تے اختیار مریک کہ او 30 درسد طالب علم آتے ہاسٹل آتیٹی تخنگ کیر۔ پنچ شنبے نادے آ بنجائی وزیر تعلیم و کسبی تربیت شفقت محمود پارینے کہ تدوک آ دے مروک آ بین الصوبائی وزرائے تعلیم کانفرنس اٹی ستمبر اٹ تعلیمی ادارہ غاتے ملنگ آ امنا کننگانے ہرانا این سی او سی نا دیوان ہم منظوری ءِ تسنے۔ اوپارے کہ مچ آ ملک انا غٹ تعلیمی ادارہ غاتے 15 ستمبر آن ملنگک۔ تعلیمی ادارہ غاتے ملنگ نا بابت اگست اٹ جان جوڑی نا چاہندار آتون اِرا دیوان مریک ہرافتے ٹی کورونانا دین انا جاچ ءِ ہلنگک۔ بنجائی وزیر پارے کہ اگہ حالیت آک سہی متوس تو تعلیمی ادارہ غاتے ملنگ پننگک۔ اوپارے کہ جولائی نا ارٹ میکو ہفتہ آن فنی تعلیم نا ادارہ غاک امتحان ہلنگ کیرہ وخت اس کہ مدرسہ غاتے ہم امتحان ہلنگ نا موکل مریک۔ امتحان تیکن ایس او پی تیا عملدرآمد المی مریک و ہراادارہ ایس او پی تیا عمل کپک اودے امتحان ہلنگ آن توننگک۔ اوپارے کہ تعلیمی ادارہ غاتے استاد و اسٹاف بٹنگ انگ و دفتر آتے ملنگ نا موکل مریک۔ یونیورسٹیک عئید آن پد 30 درسد طالب علم آتے ہاسٹل اٹی بٹنگ کیرہ ہراعلاقہ غاتیٹی انٹرنیٹ نا آسراتی اف یا ہرا طالب علم پٹ وپولی کاریم کننگ ءِ اوفتے اولیت تننگک، ادارہ غاک اسٹاف و بٹنگوک آطالب علم آتا ٹیسٹءِ کرفنگ نا پابند مریرہ۔ اوپارے کہ تعلیمی ادارہ غاتے ملنگ کن ایس او پی تا تیاری کن سلاہ بننگ ءِ۔ صوبہ غاتے ہم پارینن کہ ایس او پی تا تیاری کن سلاہ ایتر۔ شفقت محمود پارے کہ تعلیمی ادارہ غاتے مرحلہ وار ملنگک۔ اول بھلا چناتے بٹنگک۔ کلاس آتے بشخنگ نا ہم سلاہ ءِ تانکہ چناتا نیام اٹ فاصلہ ءِ برجاتخنگے۔ اوپارے کہ او نجی تعلیمی ادارہ غاتا مالی مشکل آتیان معلومدار ءِ اوفتیکن چندی سلاہ تیا سجفنگ انگ ءِ ہرافتیا زوت فیصلہ مریک۔
