اسلام آباد۔ 09 جولائی (اے پی پی) قومی ادارہ جان جوڑی اسلام آباد بھلا عئید انا وخت آ کانگو اِڷ انا گمانی گڑتی تا رداٹ اونا توننگ و کنٹرول نا بابت ایڈوائزری جاری کرینے، کانگو ہیمرجک اِڷ(سی سی ایچ ایف) ہرادے گونڈکانگو اِڷ پاننگک، اسہ خطرناک ءُ وڑاسے نا وائرس آن تالان مریک۔ ایڈوائزری نا رداٹ بھلاعئید آن مست قربانی نا ساہدار تا ہڷ وتس اٹی ودکی نا سوب آن کانگو اِڷ انا خطرہ نمان وڑاٹ ودک۔ پڑی تیٹی رش و ساہدار آتون برا ہ راست رابطہ نا سوب آن کانگو وائرس نا تالان مننگ نا خطرہ نا ہم ودنگ نا گمان ءِ۔ دا ایڈوائزری نا مسخت انسان و ساہدار تا جان جوڑی تون تعلقدار ادارہ غاتے معلومدار کننگ نا ءِ تانکہ کانگو اِڷ و کوویڈ۔ 19 نا توننگ و کنٹرول کن وخت آ گام گیج کننگ مرے۔ ایڈوائزری نا رداٹ داسکان تو کانگو اِڷ انا ویکسین ملپننگ ءِ ہنداخاطرآن لس بندغ آتے ناجوڑی آن بچفنگ و دانا کنٹرول کن مندرجہ ذیل پارت آتیا چکار کننگے، پڑی تا دورہ ٹی ، پورو آستین و ہلکا رنگ انا پُچ بینر۔ دستانہ، ماسک و ہینڈ سینیٹائزر آتے کاریم اٹ اتیر و ایلوفتیان فاصلہ تخر۔ دوتا سفائی نا خیال ءِ تخر۔ عئید انا وخت آ بھلا خاہوتی مچی و ساہدار تا قربانی تون اوار غٹ رش والا جاگہ غاتیان پاناد کیر۔ ساہدار تے دُوخلنگ آن پد یا دتراٹ غرق دوتے سابون و دیر اٹ جوان سلر۔ دا ایڈوائزری آن بیدس قومی ادارہ جان جوڑی اسلام آباد بشام اٹی مروک آ گمانی دینی مرض آتا بابت معلومدار کننگانے۔ دا مراسلہ ءِ شینک کننگ نا اصل مسخت دینی مرض آتا تالان مننگ آن مست بنجائی، صوبائی و ضلعی محکمہ جان جوڑی نا کمامدار و چاہندار آتے خبڑدار کننگ و مرض آتا تالان مننگ نا حالیت اٹ وخت آ مون تننگ کن آسراتی فراوان کننگ نا ءِ تانکہ دا مرض آتیان مروک آ مرک آتیٹی کمتی کننگ مرے۔ قومی ادارہ جان جوڑی دامراسلہ ٹی تیرمہ و بشام اٹی مروک آ گمانی دینی ناجوڑی کون آ اسہال، کوویڈ۔ 19، کانگواِڷ، ڈینگی اِڷ، لیشمینیا، ملیریا، سورک، پولیو و ٹائیفائیڈ نا بارواٹی جان جوڑی نا کمامدار و تعلقدار ادارہ غاتے رکھی گام گیج آتا بارواٹ معلومدار کرینے و جان جوڑی تون تعلقدار ادارہ غاتے موسمی گڑتی تیا پدریسہ نظر تخنگ و غٹ گمانی گام گیج ہلنگ نا پارت ہم کرینے۔
