اسلام آباد۔ 09 جولائی (اے پی پی) قومی ایئر لائن(پی آئی اے) کراچی جہاز شکست اٹ زوال کروک آ مسافر آتا شکست نا جاگہ و ہموکان ملوک آ گڑاتے اوفتا خاہوت آتا حوالہ کننگ نا فیصلہ کرینے۔ ترجمان پی آئی اے نا کنڈآن پنچ شنبے نادے آ جاری بیان اٹی پاننگانے کہ 22 مئی آ جناح انٹرنیشنل بالی پٹ انا خڑک لینڈنگ نا وخت آ بھس مروک آ بدبخت جہاز پی کے 8303 نا شکست نا جاگہ و ہموکان ضلعی انتظامیہ و کمکی کارندہ غاتے گڑاس مسافر آتا گڑاس گڑاملانے۔ ترجمان پارے کہ فیصلہ کننگانے کہ زوال کروک آ مسافر آتا خاہوت آتے دا گڑاتے 11 آن 13 جولائی اسکان اوفتا خاہوت آتا دوٹی تننگک۔ترجمان پارے کہ دا بابت اسہ پبلک نوٹس اس جاری کننگانے۔ داگڑاتے متکن آ کراچی بالی پٹ انا ٹرمینل 1 نا خڑک واقع پی آئی اے ٹریننگ سینٹر اٹ 11 آن 13 جولائی آ سہب انا 10 بجہ غان بیگہ نا 5 بجہ اسکان درستی راستی کن تخنگک۔ خاہوت آتیان خواست کننگانے کہ او تینا دوست آتا گڑاتا درستی راستی کن تینا شناختی کارڈ انا نقل اتون اوار ہندا بڑزکو وخت ءُ پاس آ بریر تانکہ دا گڑاتے اوفتا حوالہ کننگ مرے۔ ترجمان پارے کہ پبلک نوٹس اٹ آسراتی تروک آ تعلقدار کمامدارآتا پن و فون نمبر ءِ ہم جاری کننگانے، خاہوت آتا آسراتی کن ہرا آفیسر آتا پن تے جاری کننگانے اوفتیٹی خورشید احمد خان لینڈ لائن فون نمبر021-99044394، موبائل فون نمبر 0322-7423725، انعام اللہ جمیل لینڈ لائن فون نمبر 021-99044862، موبائل فون نمبر 0333-3101089اوار ءُ۔
