اسلام آباد۔ 09 جولائی (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ پارینے کہ حکومت ءِ اقتصادی تنکی میرات اٹی ملاسس، ڈالر نا قدر ءِ رزاک آ کم تخنگ کن فارن ایکسچینج ءِ چٹی کننگا ہراڑآن زرمبادلہ نا کوڑی تیٹی بھلو کمتی اس بس، ڈالر نا مصنوعی قدر انا سوب آن مسلم لیگ ن نا دور حکومت نا پنچ سال اٹی برآمد آتیٹی صفر درسد ودکی مس، حکومت ایف بی آر تون اوار غٹ ادارہ غاتے ٹی اصلاحات اتنگ ءِ، دا عمل اٹ نجی بشخ ءِ ہم اوار کننگک، کوروناوائرس نا دین آن پاکستان نا زرگزران ءِ 3 آن ہلیس 4 کھرب روپئی نا نسخان مس۔ دین آن شون ہلوک ملک آتیانبار پاکستان اٹی ہم نیزگاری و بے روزگاری ٹی ودکی مسنے، باندات آ پوائنٹ اسکورنگ نا جاگہ غا راستکی و حساب وکتاب ءِ ہُننگ المی ءِ۔ نجی ٹی وی پروگرام اٹ گپ وتران کرسا او پارے کہ پاکستان تحریک انصاف نا حکومت ءِ اقتصادی تنکی میرات اٹی ملاسس، زرمبادلہ نا کوڑی بیرہ 9 ارب ڈالر سلیسوسس، حکومت کن زرگزران ءِ چلیفنگ مشکل مسوسس، ڈالر نا قدر ءِ رزاک آ کم تخنگ کن فارن ایکسچینج ءِ چٹی کننگا ہراڑآن زرمبادلہ نا کوڑی تیٹی بھلو کمتی اس بس، مسلم لیگ ن نا پنچ سال اٹی برآمد آتے ٹی صفر ودکی مس انتئے کہ ڈالر نا قدر ءِ مصنوعی وڑاٹ کم کننگ آن ننا درآمد آتیٹی بھاز ودکی مسوسس۔ دا مشکل حالیت آتیٹی حکومت مالیاتی نظم و ضبط ءِ برقرار تخسا مشکل ءُ فیصلہ کرے، حکومت برآمد آتا مون آ دننگ آ چکار کرے، دامسخت کن برآمدی بشخ ءِ آسراتی تننگا۔ حسابات جاریہ نا نسخان ءِ 20 ارب ڈالر آن کم کرسا اینخو نا سال دادے مسہ ارب ڈالر نا کچ آ اتنگانے و مچ آ دنیا خناکہ پاکستان نا زرگزران تنکی آن پیش تمنگ ءِ۔ اوپارے کہ پیشن نا وام تا زرتس نا عمل نا ہم بناءِ کننگا، اینخو نا سال حکومت مستین اٹ ہلوک آ وام و سود انا مد اٹ 2900 ارب روپئی نا زرتننگ ءِ۔ اوپارے کہ حکومتی مالیاتی ڈسپلن ءِ برجاتخسا سخت وڑاٹ حکومتی خڑچ آتے کم کرے و ملکی تاریخ اٹی اولیکو وار پرائمری بیلنس مثبت مس۔ ڈاکٹر عبدالحفیظ شیخ پارے کہ ساڑی حکومت گیشتر وام مستین اٹی ہلوک آ وام و سود انا پدی تننگ و مالی نسخان ءِ کم کننگ کن ہلکونے، صدر، وزیراعظم، کابینہ تون اوار خڑچ آتے ٹی پیدوار کمتی اتنگانے، شرح سودءِ 13.25 درسد آن کم کرسا 7 درسد نا کچ آ اتنگانے، حکومت اقتصادی ودکی خواہک دامسخت کن بجٹ اٹی 8 بھلو فیصلہ کننگانے، 2 ہزار آن زیات خام مال گڑاتیا ڈیوٹی ٹی چھوٹ تننگانے، چنکاکاروبار کن وام تیٹی زرتلافی تننگ انگ ءِ، 280 ارب روپئی خولم نا ہلنگ کن جتا کننگا تانکہ بزغر و کشارگرآتا دوتیا پیسہ برے، سیمنٹ آ ایکسائز ڈیوٹی ءِ کم کننگا، ملکی تاریخ اٹی اولیکو وار اسہ کڑوڑ 60 لکھ خاہوت آتے بے پرخ آن نغد امداد تننگا۔ اسہ سوج اسے آ اوپارے کہ کروناوائرس نا دین آن پاکستان نا زرگزران ءِ 3 آن ہلیس چار ٹریلین روپئی نا نسخان مسنے، داڑآن شون ہلوک ملک آتیانبار پاکستان اٹی ہم نیزگاری و بے روزگاری ٹی ودکی مسنے، داباندات آ پوائنٹ اسکورنگ نا جاگہ غا راستکی و حساب وکتاب ءِ ہُننگ المی ءِ، کورونانا سوب آن برآمدات، ریٹیل تون اوار غٹ بشخ آک زہمی مسنو۔ دا نسخان تے کم کننگ کن حکومت 1240 ارب روپئی نا کمکی پیکج اس تسنے، حکومت بجلی نا صارف آتے بل آتازرتس اٹی مسہ تُو انا آسراتی تس۔ چنکا کاروباری تیکن مسہ تُواسکان بجلی نا بل آتے حکومت ادا کرینے، حکومت پین آسراتی ہم تننگ ءِ، برآمدات و کشاری بشخ اکن مہالو آن سبسڈائز نرخ آتیا بجلی و گیس انا فراوانی کننگ انگ ءِ، داوخت آ پاکستان اٹی قدرتی گیس انا صارف آک اونا خڑچ انا ہشت می بشخ انا بریبر بل تننگ ءُ۔ ڈاکٹر عبدالحفیظ شیخ پارے کہ زرتلافی نا مد اٹ تروک آ پیسہ غاک الس نا خراج آتیان بریرہ ہنداخاطرآن دانا خڑچ اٹی احتیاط کننگ نا گرج مریک تانکہ اصل ضرورت مند آتسکان داپیسہ غاتے سرکننگے۔ خراج ہدف آتا بابت سوج آ اوپارے کہ پاکستان خراج جمع کننگ اٹ نزور پک مسنے، نن مشکل اسے ٹی 10 آن ہلیس 11 درسد اسکان خراج جمع کننگ کینہ ہرانا سوب آن ننے الس نا جان جوڑی، تعلیم و ایلو بنداوی آسراتی تا فراوانی ٹی مشکل آتون مون تروئی تمک۔ ساڑی حکومت خراج اٹی ودکی نا کوشست آتا رداٹ زرگزران ءِ دستاویزی کننگ کن گام گیج کرے، ہرافتا سوب آن خراج تروک آتا کچ اٹی 7 لکھ اسکان ودکی مس، جولائی آن ہلیس فروری اسکان کٹیا تیٹی 17 درسد ودکی مس و دا اسہ حقیقت اسے، کورونا نا سوب آن کٹیا تا دوئی کننگ اٹ 500 آن ہلیس 600 ارب روپئی اسکان نا کمتی تون مون تروئی تمانے۔
