کورونانا دین آن راج انا نزور و مزور تپہ غٹ آن زیات زہمی مس، اوفتا رکھ اکن اسیجائی حکمت عملی اس جوڑ کروئی مریک، پاکستان کرفیو و پورو لاک ڈاؤن نا جاگہ غا سمارٹ لاک ڈاؤن نا وڑوڈول ءِ اختیار کرے و تعمیرات و کشاری بشخ آتے ملا، وزیراعظم عمران خان نا آئی ایل او نا جہانی کانفرنس آن تران

اسلام آباد۔ 08 جولائی (اے پی پی) وزیراعظم عمران خان پارینے کہ کورونا نا دین آن راج انا نزور و مزور تپہ غٹ آن زیات زہمی مس، اوفتا رکھ اکن اسیجائی حکمت عملی اس جوڑ کروئی مریک، پاکستان کرفیو و پورو لاک ڈاؤن نا جاگہ غا سمارٹ لاک ڈاؤن نا وڑوڈول ءِ اختیار کرے و تعمیرات و کشاری بشخ آتے ملا، غیر رسمی زرگزران تون وابستہ مزور تپہ غاتے نغد امداد فراوان کرے، بھلو کچ اسے ٹی ننا ورکرآک ایلو ملک آتیٹی کاریم کیرہ و درملکی زرمبادلہ کٹیا کیرہ، ننے بھلا ملک آتے دا ویل آ قائل کروئی مریک کہ او مزور تپہ تون ہمدردانہ رویہ اختیار کیر۔ داخیال آتا درشانی ءِ او انٹرنیشنل لیبر آرگنائزیشن (آئی ایل او) نا کنڈآن پنچ دے ئی جہانی کانفرنس آن ویڈیو کانفرنس نا کمک اٹ تران کرسا کرے۔ وزیراعظم عمران خان پارے کہ دا کانفرنس نا اڈتننگ و داڑآن تران کن بٹنگ انگ آ ڈائریکٹر جنرل آئی ایل او نا منت وار اُٹ۔ اوپارے کہ کورونانا دین انا سوب آن لاک ڈاؤن آن مچ آ دنیا نا مزور تپہ زہمی مسنے، دا کانفرنس لیبر کمیونٹی نا رکھ انا بابت بے کچ اہمیت تخک۔ اوپارے کہ دا دین گڑاس ملک آتیٹی دُن تو کم مننگ ءِ ولے کیہی ملک آتیٹی دا ترند مننگ ءِ، ننے لیبر کمیونٹی نا رکھ اکن اسیجائی حکمت عملی اس جوڑ کننگ نا گرج ءِ۔ دا دین آن مزور تپہ غٹ آن زیات زہمی مسنے، ننکن دا دین اسہ بھلو چیلنج اسے نا حالیت اٹ مون آ بس، اسہ کنڈننے تینا مخلوق ءِ دا دین و دانا تالانی آن بچفوئی ئس انتئے کہ اگہ دا ترندی اٹ تالان مسکہ تو ہسپتال آتیٹی ناجوڑ آتا رش لگاکہ و سنبھالنگ مشکل مسکہ۔ ہنداخاطرآن دا دین انا تالانی ءِ توننگ ننکن اہم ئس۔ ایلو کنڈآ ننا زرگزران اٹی زیات تر مخلوق چنکاکاروبار و لیبر اتون گنڈوک ءُ، لاک ڈاؤن مننگ تون دامخلوق بے روزگار مس ہرانا سوب آن دا خاہوت آتا گرج آتے پورو کننگ مشکل مس۔ اوپارے کہ ننا زرگزران نا بھلا بشخ غیر رسمی زرگزران آ تالان ءِ و زیات تر مزور تپہ رجسٹرڈافس۔ لاک ڈاؤن نا سوب آن اولیکو اِرا مسہ ہفتہ ٹی چنکا تپہ ءِ بھاز مشکل آتون مون تروئی تما اوکان پد نن سمارٹ لاک ڈاؤن نا پالیسی ءِ اختیار کرین انتئے کہ ننے تینا چنکا و نزور تپہ ءِ بچفوئی ئس۔ نن السی مچی، اسکول و کالج، گوازی تا سرجزآتون اوار مخلوق نا مچ مننگ آ پابندی خلکن ولے نن تعمیرات و کشاری بشخ ءِ ملان انتئے کہ کشاری بشخ ءِ بند کننگ آن خور انا تنکی ودی مسکہ۔ داکان بیدس نن نزور تپہ ءِ نغد زر انا گدریفنگ نا عمل نا بناءِ کرین، غیر رجسٹرڈ بندغ آتے دمدستی وڑاٹ احساس پروگرام اٹی رجسٹرڈ کرین۔ رجسٹریشن کن نن خصوصی ڈیسک جوڑ کرین۔ چنکو وخت اسے ٹی پاکستان اٹی وخت اس ہم داخہ بھلو کیش گرانٹ تننگتنے ہراننے لاک ڈاؤن نا بدترین زہم آتیان بچفے۔ اوپارے کہ ننا برعکس بھارت کرفیو خلک، ہموڑے لکھ آ مزور بے روزگار مننگ آن حالیت آک خراب مسر و مخلوق بین آن کسکر، ہموڑے لاک ڈاؤن آن نیزگاری نا کچ ودا۔ اوپارے کہ آخبت بے پک ءِ و ہچ پاننگ مفک کہ حالیت آتے سنبھالنگ اٹ اخس وخت لگک۔ اوپارے کہ نن دعا کننگ اُن کہ دانا ویکسین زوت برے تانکہ داوائرس نا مون ءِ توننگ مرے۔ وزیراعظم پارے کہ مزور تپہ دا دین آن غٹ آن زیات زہمی مسر۔ ننے اواری اٹ مزور آتیکن اسیجائی حکمت عملی اس جوڑ کروئی مریک۔ داوخت آ کاروبار خواتہ مننگ نا گواچی ءِ، چنکا و نیامئی درجہ نا صنعت بے حد زہمی مسنو۔ اوپارے کہ پیشن نا ملک آتیٹی رہینگوک شاری تیکن ہم حکمت عملی اس اختیار کروئی تمک انتئے کہ بھلو کچ اسے ٹی ننا ورکرآک ایلو ملک آتیٹی ءُ و ننا سیبو درملکی زرمبادلہ غاٹے۔ اوپارے کہ ننے بھلا ملک آتے دا ویل آ قائل کروئی مریک کہ او مزور تپہ تون ہمدردانہ رویہ اختیار کیر۔ ایہن تو او تینٹ مشکل حالیت آتیٹی ءُ۔ وزیراعظم پارے کہ مزور آتیا زہم آتے کم کننگ کن جامع حکمت عملی اس تینا کروئی مریک، مشکل وخت اٹی اہم انگا کانفرنس نا اڈتننگ آ منت وار اُٹ۔ نن تینا آزموندہ غاتے دنیا نا ایلو ملک آتون شیئر کننگ کن تیار اُن و ایلو ملک آتا آزموندہ غاتیان فائدہ ہرفنگ نا ہم خواہش مند اُن۔ اوپارے کہ نن تینا مشکل وحکمت عملی آن دنیا ءِ معلومدار تخنہ، ای سمجھیوہ کہ دا کانفرنس بناءِ، کنے یخین ءِ کہ دا مزور آتا کمک کن بے حد اہم پک مریک۔ وزیراعظم اومیت نا درشانی ءِ کرے کہ اواری اٹ تولنگ و ہیت و گپ اٹ مون آ ہِننگ کن کسر اس پیش تمک۔ پنچ دے ئی کانفرنس آن کیہی جہانی راہشونک، چندی ملک آتا صدر و وزیر اعظم آک گپ وتران کریر و تینا ملک آتیٹی کورونا نا دین آن زہمی مروک آ تپہ غاتیکن کروک آ گام گیج آتے تالان کریر و دا چرجوئی ٹی تینا سلاہ تے ہم پیش کریر۔