اسلام آباد۔ 07 جولائی (اے پی پی) چیئرمین سینیٹ صادق سنجرانی پارینے کہ کورونا وائرس جہانی زرگزران تے بھلو بے چیٹ ءُ حالیت اسے نا باٹی تسنے، ہنداخاطرآن وائرس نا مون ءِ توننگ کن اواری اٹ کوشست کروئی مریک۔ داہیت ءِ او سے شنبے نادے آ داڑے برطانوی ہائی کمشنر تون اوڑدہی ٹی گپ وتران کرسا پارے۔ اوڑدہی ٹی اہم علاقائی باندات و ہڑتوم آ کنڈآتا تعلقداری تیا ہم گپ وتران مس۔ چیئرمین سینیٹ پارے کہ پاکستان برطانیہ تعلقداریک تاریخی ءُ، ہڑتوم آ کنڈآتا کمکاری ءِ پین ودفنگ نا خواہندار ءُ۔ کوروناوائرس نا سوب آن ودی مروک آ حالیت آتیا گپ وتران کرسا چیئرمین سینیٹ پارے کہ کورونا وائرس جہانی زرگزران تے بھلو بے چیٹ ءُ حالیت اسے نا باٹی تسنے۔ اوبرطانیہ ٹی وائرس نا سوب آں مروک آ جانی نسخان تیا است ہسونی نا درشانی ءِ کرے۔ برطانوی ہائی کمشنر ہم پاکستان اٹی وائرس نا سوب مروک آ جانی نسخان تیا است ہسونی نا درشانی ءِ کرے۔ صادق سنجرانی پارے کہ پاکستان اٹی وائرس تالان مننگ ءِ، حکومت دانا مون ءِ توننگ کن کوشست کننگ ءِ۔ اوپارے کہ سمارٹ لاک ڈاؤن، ٹیسٹنگ، ٹریسنگ و قرنطینہ کون آ گام گیج آتا کمک اٹ وائرس نا تالانی ءِ توننگ انگ ءِ۔ حکومت الس نا رکھ و زرگزرانی سرجزآتا بحالی کن کوشست کننگ ءِ۔ اوپارے کہ شونداری بشخ اٹی پاکستان و برطانیہ نا کمک بے مٹ مسنے۔ موسمیاتی بدلی آن پاکستان بھاز بے وڑ زہمی مسنے۔ ماحولیاتی ویل آتے ایسر کننگ حکومتی اولیت آتے ٹی اوار ءِ۔ اوپارے کہ موسمیاتی بدلی تا مقابلہ ءِ کننگ کن برطانوی کمکاری ءِ بخیر اٹ پانہ۔ اوکشمیر آ برطانوی موقف آہم منت واری ءِ ہرفے۔ چیئرمین سینیٹ پارے کہ ہڑتوم آ کنڈآتا پارلیمانی رابطہ غاتے پین سوگو کننگ نا گرج ءِ۔ بین الپارلیمانی رابطہ غاک ویل آتیا اسیجالائحہ عمل اختیار کننگ اٹ کمکار مریک۔
