اسلام آباد۔ 07 جولائی (اے پی پی) بلوچستان حکومت اینخو مالی سال 2020-21ء نا سرکاری بشخ انا شونداری پروگرام اٹی کشت وکشار نا بشخ انا شونداری کن 4 ارب 1 کروڑ 21 لکھ روپئی جتا کرینے۔ بلوچستان حکومت کشت وکشار نا بشخ انا کمامدارآتارداٹ حکومت غیر شونداری بشخ اکن، 11 ارب 71 لکھ روپئی جتا کرینے، وخت اس کہ صوبہ ٹی محکمہ کشت وکشار نا بحالی کن 640، 775ملین روپئی تخنگانے۔ بلوچستان حکومت مالی سال 2019-20ء ٹی کشاری پیداوار نا گچینی کن مچ آ صوبہ نا زمیندار و کشارگر آتیٹی 31445کلوگرام کشاری بج، 5229کشاری اوزار و7387 روئی نا تھیلہ بشخاسس۔ ملخ آتا جلہو آتیان ہم کشاری پیداوار اٹی نمان کمتی واقع مسنے، ہراڑکن دسمبر 2019ء ٹی صوبائی حکومت ءِ ملخ ایمرجنسی نا پڑو ءِ کننگاسس۔ ملخ آتا گڑتی تا رداٹ، محکمہ کشت وکشار دانا توننگ کن 181 ٹیم جوڑ کریسس و بروک آ مالی سال 2020-21ء ٹی اسپرے کننگ وملخ آتا گڑتی تا مون ءِ توننگ کن ایلو بنداوی گام گیج کننگ کن 500 ملین روپئی تخانے۔ وخت اس کہ مالی سال 2019-20ء ٹی ، دارداٹ 404 ملین روپئی نا زر جاری کننگاسس۔ صوبہ نا کشاری پیداوار ءِ جہانی منڈی تسکان رسینگ فراوان کننگ کن، اینخو مالی سال 2020-21ء ٹی اسہ کشاری ایکسپو اسے نا بست وبند ءِ کننگک۔ صوبہ ٹی پوسکن آ کشارگری ءِ مون آ دننگ کن، 11 ضلع غاتے ٹی 85 ٹیوب ویل کشاری فارم تے کشاری پیداوار اٹی ودکی کننگ کن شمسی توانائی تون گنڈنگانے۔ اینخو مالی سال 2020-21ء ٹی حکومت میرانی ڈیم کمانڈ ایریا فیز2، سبکزئی ڈیم فیزIII، کچی کینال کمانڈ ایریا ءِ شون تننگ نا گام گیج آتیا سفجنگ ءِ ہراڑآن لکھ آ ایکڑ بنجر ڈغار تا دسنگ اٹ کمک رسینگک۔ اینخو مالی سال 2020-21ء ٹی صوبہ ٹی کشارگر آتے کھد آ سبسڈی تننگ کن 24 ملین روپئی جتا کننگانے۔ ساڑی حکومت کشاری کارندہ و پیدوار نا بشخ انا تکنیکی عملہ نا لائخی تیٹی ودکی کن فنڈ پک کننگ نا فیصلہ ءِ کرینے۔ محکمہ کشت وکشار اٹی غٹ ضلعی و ڈویژنل آفیسر آتے اسہ ہزار فیلڈ اسسٹنٹس، گاڈی و موٹرسائیکل تا فراوانی کن حکومت بلوچستان بجٹ 2020-21ء ٹی فنڈ جتا کرینے۔ اینخو مالی سال اٹی قلعہ سیف اللہ و قلات ضلع غاتے ٹی کولڈ اسٹوریج نا جوڑ کننگ کن 100 ملین روپئی جتا کننگانے۔ اینخو مالی سال 2020-21ء ٹی کشت وکشار نا بشخ اکن 263 پوسکن ءُ پوسٹ ٹہیفنگا۔
