اسلام آباد۔ 07 جولائی (اے پی پی) قومی اسمبلی ٹی قائد حزب اختلاف شہباز شریف پارینے کہ میڈیا ریاست نا چارمیکو تمبہ تکنگک، اسپیکر قومی اسمبلی آجوئی سلاہ درشانی ءِ پک کننگ کن تینا کڑد ءِ ادا کے، دا چرجوئی ٹی کانود جوڑ کننگ و قاعدہ نا ٹہیفنگ کن پارلیمانی کمیٹی اس جوڑ کننگے۔ سے شنبے نادے آ اسپیکر قومی اسمبلی اسد قیصر آ مون تروک آ تینا چھٹی ٹی اوپارینے کہ چینل 24 نا بند مننگ آن ہزار آ مخلوق بے روزگار مسنے۔ اوگڑاس پین مثال ترسا پارے کہ میڈیا ءِ جمہوریت نا چارمیکو تمبہ تکنگک۔ دستور پاکستان اٹی آجوئی سلاہ درشانی و حوالکاری اسکان رسینگ ءِ اسہ بنداوی حق اس امنا کننگانے۔ دا دستوری ضمانت ءِ 18 می ترمیم پین پکا و جاندار کرینے ۔ اوپارے کہ اپوزیشن نا نمائندگی ءِ کرسا ای نے آن خواست کیوہ کہ چینل 24 ءِ بحال کرفنگ، میر شکیل الرحمان ءِ یلہ کننگ و میڈیا نا ایلو باندات آتے ایسر کننگ، قاعدہ کانود نا بابت اسہ پارلیمانی کمیٹی اس جوڑ کننگے ہرا دا غٹ باندات آتا جاچ ءِ ہلے، کمیٹی میڈیا نا نمائندہ غاتا غاو تے بنسا اصلاح حوال کن سلاہ ایتے ہرافتیا پارلیمان نا کمک اٹ حکومت آن عملدرآمد کرفنگے۔
