اسلام آباد۔ 06 جولائی (اے پی پی) وزیراعظم عمران خان بورہ نا کوڑی کننگ نا برخلاف گچین کارروائی و اوار سوار کننگ نا برخلاف زیرو ٹالرینس پالیسی اختیار کننگ نا پارت کرسا پارے کہ خولم و نُت انا الس ءِ بے سلنگ آن و کم نہاد آ رسینگ انگ حکومت نا اولیت ءِ، بین الصوبائی ہن و بر نا بابت آسانی ءِ پک کننگے، خولم و نُت انا بابت بنجا و صوبہ غاک اسیجائی ءُ حکمت عملی اس سجفر، گرج انا رداٹ کوڑی تے پک کننگے، مستین اٹ کوڑی کننگ و کٹیا خوری ٹی اوار مروک آک نئے بیرہ بزغر آتے اوفتا روا کٹیا غان محروم کریر بلکن لس بندغ ءِ زیات نہاد آ نُت ہلنگ آ بیوس کریر۔ داخیال آتا درشانی ءِ او ملک اٹی کنوئی آ گڑاتا نہاد آتے ٹی کمتی اتنگ نا گام گیج آتا بابت جاچ دیوان نا کماشی ءِ کرسا کرے۔ دیوان اٹی وزیر نیشنل فوڈ سیکورٹی سید فخرامام، سلاہکار خزانہ ڈاکٹر عبدالحفیظ شیخ، سلاہکار واپار عبدالرزاق داؤد، خصوصی کمکار ڈاکٹر شہباز گل و سینئر آفیسر آک ساڑی ئسر۔ دیوان اٹی صوبہ پنجاب، سندھ، بلوچستان نا چیف سیکرٹریک و ایڈیشنل چیف سیکرٹری خیبرپختونخواہم ویڈیو لنک انا کمک اٹ بشخ ہلک۔ صوبائی چیف سیکرٹریک دیوان ءِ بنداوی آ ضرورت نا گڑاتا نہاد آتے ٹی کمتی اتنگ کن گام گیج و دا گام گیج آتا بھرم تا تقابلی جاچ ءِ پیش کرے۔ کوروناوائرس نا حالیت آتا رداٹ صوبہ غاتے ٹی المی آ دوائی و آکسیجن نا سپلائی ءِ بے سلنگ آن ممکن کننگ نا بابت ہم بشخ ہلوک آتے سرجم معلومدار کننگا۔ چیف سیکرٹری پنجاب بورہ و نُت انا کوڑی کننگ نا برخلاف کریک ڈاؤن نا ذکر ءِ کرسا دیوان ءِ معلومدار کرے کہ داتم اسکان 716 ٹن نُت و اسہ ارب آن زیات مالیت نا 16008.5ٹن بورہ بھلا کوڑی کروک و ڈیلر آتیان ہلنگانے۔ دیوان ءِ پاننگاکہ انتظامیہ و تعلقدار کمامدارآتا گام گیج آتیٹی صوبہ پنجاب اٹی بورہ نا نہاد غٹ آن کم ءِ۔ وزیراعظم عمران خان جے آئی ٹی نا رپورٹ نا رداٹ بورہ نا کوڑی کننگ نا برخلاف پین کارروائی کننگ نا پارت کرے۔ وزیراعظم پارت کرے کہ اوار سوارکننگ نا برخلاف زیروٹالرینس پالیسی اختیار کننگے۔ خولم و نُت انا السءِ بے سلنگ آن و کم نہاد آ رسینگ انگ ءِ ممکن کننگ نا بابت چیف سیکرٹری پنجاب بشخ ہلوک آتے معلومدار کرے کہ پنجاب کابینہ نا منظوری آن پد صوبائی حکومت کم و ود 35 ارب روپئی مالیت نا خولم پگہ غان ریلیز کننگ ءِ۔ دا گام گیج نا سوب آن نئے بیرہ نت انا کاختی چٹک بلکن خولم و نُت انا نہاد اٹی مرحلہ وار کمتی ہم مریک۔ وزیراعظم عمران خان صوبہ پنجاب نا کنڈآن خولم نا بابت فیصلہ نا ستاءِ کرسا پارے کہ خولم نا کم نہاد و بے سلنگ آن رسینگ انگ حکومت نا اولیت ءِ۔ اوپارت کرے کہ دا ہیتءِ پک کننگے کہ خولم نا بین الصوبائی نقل و حرکت نا بابت ہچ ءُ دقت اس پیش مف۔ وزیراعظم عمران خان وزیر نیشنل فوڈ سیکورٹی سید فخر امام نا کماشی ٹی غٹ صوبائی چیف سیکرٹری صاحب آتے خولم و نت انا نہاد آتے ٹی غٹ صوبہ غاتے ٹی یکسانیت تون اوار اوار ہرصوبہ ٹی گرج انارداٹ مناسب اسٹاک ءِ پک کننگے۔ وزیراعظم مستی پارت کرے کہ دا حکمت عملی نا وت بزغر و لس شاریک مریر انتئے کہ مستین اٹ کٹیاخوری و کوڑی کننگ اٹ اوار مروک آک نئے بیرہ بزغرآتے اوفتا روا کٹیا آن محروم کریر بلکن لس بندغ ءِ ہم زیات نہاد آ نُت ہلنگ آ بیوس کریر۔
