کوئٹہ۔ 06 جولائی (اے پی پی) وزیراعلیٰ بلوچستان جام کمال خان شونداری محکمہ غاتے پی ایس ڈی پی ٹی اوار شونداری اسکیم آتا باقاعدہ مانیٹرنگ نا نظام نا جوڑ کننگ و سہ ماہی بنداو تیا جاچ دیوان اڈتننگ نا پارت کرسا پارے کہ ڈٹ آتا پوروی ٹی تاخیر، فنڈ آتا زیان و لیپس مفننگ کن صوبہ نا تاریخ اٹی اولیکو وار ساڑی صوبائی حکومت پوسکن آ مالی سال انا بناآن شونداری ڈٹ آتا عملدرآمد نا بناءِ کننگ نا روایت شاغانے ہراڑآن شونداری عمل نا بھرم آک وخت آ الس اسکان سرمریرہ۔ داخیال آتا درشانی ءِ او تدوک آ مالی سال انا پی ایس ڈی پی نا جاچ و اینخو مالی سال انا پی ایس ڈی پی آ عملدرآمد نا بنانا بابت باندات آتا جاچ دیوان اٹی کرے۔ صوبائی وزیر خزانہ میر ظہور بلیدی، چیف سیکرٹری بلوچستان فضیل اصغر، ایڈیشنل چیف سیکرٹری ڈٹ بندی و شونداری عبدالرحمان بزدار، سیکرٹری خزانہ نورالحق بلوچ، سیکرٹری مواصلات و تعمیرات نورالامین مینگل، سیکرٹری گوازی عمران گچکی و ایلو تعلقدار کمامدارآک دیوان اٹی بشخ ہلکر۔ دیوان اٹی وزیراعلیٰ نا گائیڈ لائن نا رداٹ شونداری ڈٹ آتا منظوری نا کمیٹی پی ڈی ڈبلیو پی و ڈی ایس سی نا کارروائی کن چیک لسٹ و ٹی او آرز جوڑ کننگ و محکمہ غاتا سلابت اٹ کمیٹی تا دیوان اڈتننگ نا سہ ماہی شیڈول نا جاری کننگ نا فیصلہ کننگا ہرانا مسخت پوسکن آ شونداری ڈٹ آتا وخت آ بنا و اوفتیا ترند رفتار عملدرآمد نا کمک اٹ وخت انا بچت و جتا فنڈ آتا گچین کاریم اٹ اتنگ ءِ پک کننگ نا ءِ، دیوان اٹی ڈٹ آتا فنڈ آتا منظوری و اتھرائزیشن نا پالیسی نا ہم منظوری ءِ تننگا وخت اس کہ پوسکن آمالی ایکٹ نا رداٹ محکمہ غاتے بروک آ مالی سال اکن ہم پوسکن آ ڈٹ آتا کانسیپٹ پیپر و پی سی 1 نا تیاری نا پارت کننگا، دیوان اٹی منجمد اسکیم تا جاچ ءِ ہلنگ کن چیف سیکرٹری نا کماشی ٹی ٹیکنیکل کمیٹی نا ٹہیفنگ نا فیصلہ ءِ کننگا ہرا چندی سوب آتا بناء آ منجمد کروک آ اسکیم تا سرجم جاچ ءِ ہلسا تینا سلاہ و سوج آتے کابینہ نا ذیلی کمیٹی ءِ پیش کیک و اوکان پد اوفتے حتمی فیصلہ کن کابینہ نا مون آ اتنگے، داکان مست اے سی ایس شونداری دیوان ءِ معلومدار کرے کہ تدوک آ مالی سال اٹی ہشت ارب روپئی نا خڑچ آن 1437اسکیم آتے پورو کننگا وخت اس کہ مالی سال 2020-21ء نا شونداری پروگرام اٹی 2568 ڈٹ اوار ءُ ہرافتیان 934 پوسکن ءُ و 1434برجاڈٹ ءُ، وزیراعلیٰ پارت کرے کہ ڈٹ آتا وخت آ و آب اٹ پوروی ءِ ہرحال اٹ پک کننگے۔
