اسلام آباد۔ 06 جولائی (اے پی پی) بنجائی وزیر حوالکاری وشینکاری سینیٹر شبلی فراز پارینے کہ پاکستان برطانیہ تون تینا تعلقداری تے بے کچ قدر انا نظر اٹ ہرک۔ کورونا نا آزمائش نا دا ساہت اٹی برطانوی حکومت و الس تون یکجہتی نا درشانی ءِ کینہ۔ کورونامچ آ دنیا نا زرگزران تے زہمی کرے۔ کورونا نا بارواٹی نیشنل کمانڈ اینڈ آپریشن سینٹر این سی او سی ملک اٹی کورونا نا برخلاف سوگو کوشست آتا وت ءِ۔ داخیال آتا درشانی ءِ او برطانوی ہائی کمشنر کرسچن ٹرنر تون اوڑدہی ٹی کرے۔ اوڑدہی ٹی ہڑتوم آ کنڈآتا تعلقداری، کووڈ۔ 19 نا حالیت و میڈیا نا بشخ اٹی کمکاری ءِ مون آ دننگ آ گپ و تران کننگا۔ وزیر حوالکاری و شینکاری سینیٹر شبلی فراز پارے کہ پاکستان برطانیہ تون تینا تعلقداری تے بے کچ قدر انا نظراٹ ہرک۔ ہڑتوم آ ملک آتا نیام اٹ چندی علاقائی و جہانی باندات آتیا ہم گرنچی خننگک۔ اوپارے کہ برطانیہ ٹی کورونا دین انا سوب مرک آتیا ہڑزخواہی نا درشانی ءِ کیوہ۔ آزمائش نا دا ساہت اٹی برطانیہ نا حکومت و الس تون یکجہتی نا درشانی ءِ کینہ۔ سینیٹر شبلی فراز پارے کہ کورونا دین انا عزم و ہمت اٹ مقابلہ ءِ کننگ نا برطانوی کوشست آتا ستاءِ کینہ۔ کورونا جہانی ءُ دین اسے، دادے شکست تننگ کن اواری اٹ کوشست کروئی مریک۔ اوپارے کہ پاکستان اٹی نن اولیکو دے آن الس ءِ کوروناغان رکھ تخنگ و زرگزرانی مشکل آتیان بچفنگ نا بریبر حکمت عملی اسے آ سلوک اُن۔ ملک اٹی سمارٹ لاک ڈاؤن نا حکمت عملی کارگر پک مننگ ءِ۔ کورونامچ آ دنیا نا زرگزران تے زہمی کرے۔ اوپارے کہ وزیراعظم عمران خان پدتموک ملک آتے کن وام تیٹی ریلیف کن خصوصی کوشست آتا بناءِ کرے۔ خوشی ءِ کہ جی 20 ملک آک وام تیٹی ریلیف نا فراوانی کن نمان کڑد ادا کننگ ءُ۔ سینیٹر شبلی فراز پارے کہ این سی او سی کورونا نا برخلاف قومی کوشست آتے سوگو کننگ نا مرکز ءِ، داہیت آ گپ وتران کرسا برطانوی سفیر پارے کہ پاکستان ہراوڑاٹ کورونا چیلنج تون مون تس او ننکن رول ماڈل اسے، پاکستان و برطانیہ ہڑتوم آک سنگت ءُ، کورونا دین انا برخلاف کوشست آتے ٹی پاکستان تون سلوک اُن۔
