اسلام آباد۔ 06 جولائی (اے پی پی) بھارتی سینئر سفارتکار ءِ دفتر خارجہ غا بٹنگسا 5 جون آ کوزہ گر بھارتی فوج انا کنڈآن لین آف کنٹرول (ایل او سی) نا نکیال سیکٹر اٹی جنگ بندی نا خارتس خلاف ورزی تیا برانز ریکارڈ کننگا۔ بھارتی فوج انا خارتس سم کاری ٹی مسہ چناتتون اوار پنچ بے گناہ شاری بھاز ٹھپی مسر۔ دوشنبے نادے آ ترجمان دفترخارجہ نا رداٹ سینئر بھارتی سفارتکار ءِ دفترخارجہ غا بٹنگسا برانزی مراسلہ ءِ اونا دوٹی تسر وپاننگاکہ کوزہ گر بھارتی فوج ایل او سی و ورکنگ باؤنڈری نا پدریسہ خلاف ورزی کرسا آرٹلری، بھلو و خودکار سلہہ غاتا کمک اٹ لس شاری آبادی ءِ شست کننگ ءِ۔ بھارتی سفارتکار ءِ پاننگاکہ شاری آبادی ءِ شست کننگ بھاز است ہسونی، انسانی عظمت و شرف، جہانی انسانی حق و جہانی انسانی کانود آتیان چپ ءِ۔ بھارت نا کنڈآن جنگ بندی نا داخلاف ورزی تیان علاقائی امن و سلامتی ءِ گڑتی مون تروک ءِ ہرانا نتیجہ اسٹریٹجک غلطی نا دروشم اٹ پیش تمنگ کیک۔ بھارت رواں سال اٹی 1595 وار خارتس جنگ بندی نا خلاف ورزی کرینے ہرافتے ٹی 14 بے گناہ شاری شہید و 121 ٹھپی مسنو۔ بھارتی سفارتکار ءِ معلومدار کننگاکہ ایل او سی آ بے چیٹی ٹی ودکی آن بھارت مقبوضہ کشمیر اٹی انسانی حق انا سنگین خلاف ورزی و بیدادی آن جہانی چکار ءِ اسہ کنڈ کننگ کپک۔ بھارت آ زور شاغنگاکہ او اِراہزار مسٹ نا جنگ بندی معاہدہ نا پاسداری ءِ کے، جنگ بندی نا خلاف ورزی تا دا واقعہ غاتا جاست وپاست ءِ کرفے، بھارتی فوج ءِ جنگ بندی نا شرف نا پرمان کے، ایل او سی و ورکنگ باؤنڈری آ اونا رداٹ امن ءِ براقرار تخے و اقوام متحدہ نا سلامتی کونسل نا قرارداد آتارداٹ بھارت اقوام متحدہ نا فوجی مبصرین(یواین ایم او جی آئی پی) ءِ تینا کڑد ءِ ادا کننگ نا موکل ایتے۔
