اسلام آباد۔ 03 جولائی (اے پی پی) وزیراعظم عمران خان نا کماشی ٹی بڑزکو کہول انا دیوان اس اڈ ہلک ہراٹی ملک انا تہہ و پیشن نا سلامتی حالیت آتا جاچ ءِ ہلنگا۔ جمعہ نادے آ وزیراعظم آفس نامیڈیا ونگ انا کنڈآن جاری بیان نا رداٹ دیوان اٹی وزیر دفاع پرویز خٹک، چیئرمین جوائنٹ چیفس آف اسٹاف کمیٹی جنرل ندیم رضا، چیف آف آرمی اسٹاف جنرل قمر جاوید باجوہ ، چیف آف نیول اسٹاف ایڈمرل ظفرمحمود عباسی، چیف آف ایئر اسٹاف ایئرچیف مارشل مجاہد انور خان و ڈائریکٹر جنرل انٹرسروسز انٹیلی جنس لیفٹیننٹ جنرل فیض حمید دیوان اٹی بشخ ہلکر۔ دیوان اٹی ملک انا تہہ و پیشن نا سلامتی نا حالیت آتا جاچ ءِ ہلنگا و دا عزم انا درشانی ءِ کننگا کہ پاکستان نا وتواجہی نا ہر بہا آ رکھ ءِ کننگک۔ دیوان اٹی دا عزم انا درشانی ءِ ہم کننگا کہ پاکستان تینا ہمسایہ ملک آتون پرامن بقائے تین پہ تینی آ باور کیک ولے نن تینا الس و تینا جغرافیائی سالمیت نا دفاع ءِ کننگ ہم چانہ و دانا لائخی ہم تخنہ۔ دیوان اٹی مقبوضہ جموں و کشمیر اٹی بھارتی سیکورٹی فورس آتا کنڈآن انسانی حق انا پدریسہ خلاف ورزی تیا گڑتی نا درشانی ءِ کرسا جہانی برادری آ زور شاغنگاکہ دانا نوٹس ءِ ہلے۔ دیوان اٹی کانود نافذ کروک آ ادارہ غاتا دلیری و مربوط کوشست آتے ہم خراج تحسین پیش کننگا ہراٹی پاکستان اسٹاک ایکسچینج آ ساڑی آ جلہو ءِ سرسہبی اٹ بے سہب کننگا۔
