اسلام آباد۔ 03 جولائی (اے پی پی) وزیراعظم عمران خان سی پیک اتھارٹی نا کارکڑد آ است جمی نا درشانی ءِ کرسا پارینے کہ چین پاکستان اقتصادی راہداری ملک انا روشنا آخبت نا ضمانت ءِ، داڈٹ ءِ ہر حال اٹ پورو کرسا دانا بھرم آتےہراسہ پاکستانی اسکان سرکننگرہ۔ داخیال آتا درشانی ءِ او جمعہ نادے آ چین پاکستان اقتصادی راہداری نا رداٹ ڈٹ آتا پیش رفت آ جاچ دیوان نا کماشی ءِ کرسا کرے۔ پی ایم آفس نا میڈیا ونگ انا رداٹ دیوان اٹی وزیراعظم ءِ جاری ڈٹ آتا ساڑی حالیت آتا بارواٹی معلومدار کننگا۔ وزیراعظم پارے کہ چین پاکستان اقتصادی راہداری پاکستان نا راجی و زرگزرانی شونداری نا بابت آن اسہ گچین ءُ ڈٹ اسے و پاکستان نا روشنا آخبت نا ضمانت ءِ۔ وزیراعظم دا عزم انا درشانی ءِ کرے کہ پاک چین سنگتی نا درشانی سی پیک ڈٹ ءِ ہرحال اٹ ایسر اسکان سرکینہ و دانا بھرم تے ہراسہ پاکستانی اسکان سرکننگک۔ وزیراعظم سی پیک اتھارٹی نا کارکڑد انا ستاءِ کرسا پارت کرے کہ دا ادارہ نا کارکڑد و استطاعت ءِ پین گچین کننگ کن غٹ المی گام گیج کننگک۔ دیوان اٹی بنجائی وزیر اسد عمر، مخدوم خسرو بختیار، عمر ایوب، سلاہکار واپار عبدالرزاق داؤد، چیئرمین سی پیک اتھارٹی لیفٹیننٹ جنرل (ر) عاصم سلیم باجوہ و تعلقدار وزارت آتا بڑزکو کمامدارآک ساڑی ئسر۔
