اسلام آباد۔ 03 جولائی (اے پی پی) اسپیکر قومی اسمبلی اسد قیصر ہرا قومی اسمبلی نا خصوصی کمیٹی بلوچستان نا چیئرمین ہم ارے نا کماشی ٹی بلوچستان نا تہہ نا وڑاٹ بے اُرا مروک آ بندغ(آئی ڈی پی) تا پدی و صوبہ ٹی ایلو شونداری ڈٹ آتا چرجوئی ٹی جمعہ نادے آ پارلیمنٹ ہاؤس اٹی اسہ بڑزکو کہولی دیوان اس اڈ ہلک۔ دیوان اٹی وزیر دفاع پرویز خٹک، وزیر توانائی عمر ایوب، وزیر نجکاری محمد میاں سومرو، وزیراعظم نا سلاہکار پٹرولیم ندیم بابر، ایم این اے شاہ زین بگٹی، سیفران و انرجی نا وزارت، بلوچستان حکومت و نادرا نا نمائندہ غاک ساڑی ئسر۔ اسپیکر پارے کہ ساڑی حکومت بلوچستان اٹی امن و ایمنی نا بحالی و شونداری ءِ بھاز اہمیت ایتک۔ اوپارے کہ بلوچستان قدرتی وسیلہ غاتیان شُپ ءِ ہرافتے مستین اٹی صوبہ نا الس نا گچینی کن سہی وڑاٹ کاریم اٹ اتنگتو۔ اوپارے کہ سی پیک مچ آ ملک خاص کر بلوچستان کن گیم چینجر نا حیثیت تخک و دانا رداٹ جاری ڈٹ آتا پوروی آن صوبہ ٹی شونداری و شونہالی نا پوسکن آ دور بناکیک۔ اوپارے کہ ہندا بڑزکو ہدف بلوچستان نا الس نا فعال شمولیت آن بیدس دوئی مننگ کپک۔ اسپیکر پارے کہ امن و ایمنی نا خراب حالیت آتا سوب آن بلوچستان نا مخلوق نا اسہ بھلو کچ اسے تینا آبائی اُراتے ہلوئی تما ولے امن و ایمنی نا ساڑی حالیت آتے ٹی اوفتا تینا اُراتیا پدی بننگ و صوبہ ٹی شونداری سرجزآتے ٹی اوار مننگ نا گچین ءُ وخت اسے۔ اوپارے کہ حکومت آئی ڈی پی تا تینا آبائی اُراتے پدی ہِننگ و اوفتا بحالی کن ہروڑنا آسراتی فراوان کننگ کن تیار ءِ۔ اوپارے کہ پارلیمنٹ بے اُرا بندغ آتا مشکل آتیان جوانی اٹ معلومدار ءِ و دامچ آ عمل نا چاروکی ءِ کیک۔ وزارت سیفران، حکومت بلوچستان و نادرا نا نمائندہ غاک دیوان اٹی بشخ ہلوک آتے بے اُرا بندغ آتا پدی ہِننگ نا عمل نا چرجوئی ٹی ایس او پی تا سرجم آتیان معلومدارکریر۔ نمائندہ سیفران معلومدار کرے کہ کے پی کے ڈیزاسٹرمینجمنٹ اتھارٹی نا کنڈآن وزیرستان نا آئی ڈی پی تا آبادکاری کن تیار کروک ایس او پی تا وڑآ بلوچستان پی ڈی ایم اے نا کمک اٹ بلوچستان نا بے اُرا بندغ آتا بحالی آ عمل کننگ مریک۔
