اسلام آباد۔ 03 جولائی (اے پی پی) کابینہ نا اقتصادی رابطہ کمیٹی صوبائی، علاقائی و ضلع وائز کوٹہ غان چپ 37 لکھ 25 ہزار آن زیات درخواست گزار آتے 12 ہزار روپئی نغد کمک احساس ایمرجنسی کیش پروگرام نا رداٹ فراوان کننگ کن 29.72 ارب روپئی نا منظوری ءِ تس، ای سی سی سال انا ایسر اٹ یوریا نا بفرسٹاک ءِ پک کہول آ برقرار تخنگ کن ایس این جی پی ایل نیٹ ورک آ واقع بند کروک آ اِرا پلانٹ ایگری ٹیک و فاطمہ فرٹیلائزرآتے جولائی آن ہلیس ستمبر اسکان مسہ تُو اکن 756 روپئی فی ایم ایم بی ٹی یو نا کچ آن گیس تننگ نا منظوری ءِ ہم تسنے۔ اقتصادی رابطہ کمیٹی نا دیوان جمعہ نادے آداڑے وزیراعظم نا سلاہکار خزانہ و محصولات ڈاکٹر عبدالحفیظ شیخ نا کماشی ٹی اڈ ہلک، دیوان اٹی بے نظیر انکم سپورٹ پروگرام ءِ مالی سال 2020-21کن جتا کروک 200 ارب روپئی بجٹ آن 37 لکھ 25 ہزار آن زیات درخواست گزار آتے نغد کمک کن 29.72 ارب روپئی خڑچ کننگ نا موکل تس۔ جاری مالی سال اکن بی آئی ایس پی ءِ تینا باقاعدہ آپریشن تے چلیفنگ کن ودکی گرج آتے ہم پورو کننگے۔ نیزگاری نا چٹفنگ و راجی رکھ ڈویژن نا کنڈآن کمیٹی ءِ پاننگاکہ ایس ایم ایس نا کمک اٹ درخواست آتے جمع کروک آ 31 لکھ 52 ہزار آن زیات درخواست گزار درکار وڑوڈول انا رداٹ حقدار ءُولے صوبائی و ضلع کوٹہ نا سوب آن اوفتے مالی کمک فراوان کننگ مفک ہراڑآ ای سی سی دانامنظوری ءِ تس۔ کمیٹی ءِ پاننگاکہ پنجاب حکومت مہالو آن ایس ایم ایس نا کمک اٹ درخواست جمع کروک آ 7 لکھ درخواست گزار آتے کمک تننگ آ رضامندی ظاہر کرینے، ایلو 24 لکھ 51ہزار حقدار آتے مسہ ہزار روپئی توئی کچ آن 4 تُو اسکان 12 ہزار روپئی نا کمک فراوان کننگک ہراڑآ 29.72 ارب روپئی نا خڑچ بریک۔ دیوان اٹی کمیٹی آر ایل این جی نا سیل پرائس نا بابت پالیسی پارت آتا سلاہ تا جاچ ءِ ہلک۔ ای سی سی ءِ پاننگاکہ آرایل این جی نا رکھوک مالیت نا وڑ و گیس انا ہندی نہاد نا سوب آن ایس این جی پی ایل ءِ اُرائی صارف آتے ویٹڈ ایوریج ڈومیسٹک ٹیرف نا سوب جولائی 2018آن ہلیس اپریل 2020 ء اسکان ریونیو ٹی 73.84 ارب روپئی نا کمتی نا مون تروک ءِ۔
