کوئٹہ۔ 03 جولائی (اے پی پی) وزیراعلیٰ بلوچستان جام کمال خان نا کماشی ٹی اڈ ہلوک آ اہم بڑزکو کہولی دیوان اٹی پاک اوغان بارڈر چمن نا بندش آن ودی مروک آ حالیت و داویل انا آخبتی بنداو تیا ایسر نا بابت باندات آتا سرجم جاچ ءِ ہلسا گڑاس اہم ءُ فیصلہ کننگا، صوبائی وزیر داخلہ میر ضیاء لانگو، ایڈیشنل چیف سیکرٹری داخلہ حافظ عبدالباسط، آئی جی ایف سی (نارتھ) میجر جنرل فیاض حسین شاہ، آئی جی پولیس محسن حسن بٹ، سی او ایس سدرن کمانڈ میجر جنرل دلاور، کلکٹر کسٹم بلوچستان، کمشنر کوئٹہ ڈویژن و انٹیلی جنس ادارہ غاتا کمامدارآک دیوان اٹی بشخ ہلکر۔ محکمہ داخلہ سیکورٹی و انٹیلی جنس ادارہ، پاکستان کسٹمز و انتظامیہ نا کنڈآن دیوان ءِ حوال تننگا ہراٹی اوغان ٹرانزٹ ٹریڈ، ممنوعہ و غیر ممنوعہ گڑاتا اسمگلنگ، امن و ایمنی نا حالیت ، لغڑی پیکج نا رداٹ ہندی مخلوق ءِ اوغان ٹرانزٹ ٹریڈ نا رداٹ اوغانستان آ ہنوک آ گڑاتے پدی پاکستان آ اتنگ نا چھوٹ آن بیدس ایلو باندات آک اوار ئسر، دیوان ءِ معلومدار کننگا کہ مستین اٹی سیمی بے چیٹی و بدانتظامی نا سوب پاک اوغان سیم ءِ عارضی وڑاٹ بندکرسا کننگانے و کوروناوائرس نا ساڑی آ حالیت ہم داوخت آ سیم انا بندش نا اسہ بھلو سوب اسے ، اسہ اندازہ سے نا رداٹ ہڑدے دُوانزدہ آن پانزدہ ہزار بندغ ہڑتوم آ کنڈآتیان سیم ءِ عبور کیرہ ہرافتے ٹی لغڑی پیکج تون منسلک بندغ آک ہم اوار ءُ۔ دیوان ءِ معلومدار کننگاکہ اوغان ٹرانزٹ ٹریڈ نا رداٹ اوغانستان آ ہنوک آ گڑاتے ویش بارڈر آ دڑفنگک ہرافتیان گیشتر گڑاڈیوٹی و خراج نا زرتس آن بیدس پدی پاکستان آ اتنگرہ ہراڑآن ملکی خزانہ ءِ خراج نا مد اٹی بھلو نسخان اس رسینگک وخت اس کہ اسمگلنگ و غیر کانودی ہن و بر نا آڑاٹ غیر ریاستی عنصر آتے حالیت آتیان فائدہ ہرفنگ نا موقع ملک ہراڑآن کوئٹہ تون اوار صوبہ نا چندی علاقہ غاتے ٹی امن و ایمنی و دہشت گردی نا گڑتی ساڑی سلک۔ دیوان اٹی فیصلہ کننگاکہ لغڑی پیکج اتون منسلک چمن نا ہندی بندغ آتے دمدستی وڑاٹ حکومت بلوچستان نا کنڈآن احساس پروگرام نارداٹ مالی پیکج تننگک۔ دارداٹ ہندی انتظامیہ و ایف سی دا بندغ آتا پروفائلنگ ءِ کیرہ۔ وزیراعلیٰ بلوچستان داوخت آ دمدستی وڑاٹ اِرا کمیٹی ٹہیفنگ نا پارت کرے، اسہ کمیٹی اس علاقہ ٹی نمائندگی تخوک آ سیاسی جماعت آتا نمائندہ غاتیا تالان مریک ہرا ہندی پوریاگر و لغڑی پیکج اتون گنڈوک بندغ آتون ہیت وگپ کرسا اوفتے سیم انا بندش نا سوب آتیا پت اٹی ہلیک وخت اس کہ چیف سیکرٹری نا کماشی ٹی اسہ انتظامی ذیلی کمیٹی اس دمدستی وڑاٹ ٹہیفنگا ہراٹی تعلقدار بنجائی و صوبائی ادارہ و ایف سی کمامدارآتیان بیدس چیمبر آف کامرس نا نمائندہ غاک ہم اوار مریرہ۔ ذیلی کمیٹی ویل انا آخبتی بنداو تیا ایسری کن گیگ بدل زرگزرانی سرجز، بارڈرٹریڈ نا گچین وڑوڈول، بارڈر مارکیٹ و ویئر ہاؤس آتا جوڑ کننگ، ایمیگیریشن و کسٹم نا آسراتی و ایلو سیمی باندات آتا باضابطگی تا بابت سلاہ و سوج پیش کیک۔ دیوان اٹی دا ہیت آ امنا کننگا کہ گیگ بدل زرگرانی سرجزآتا گام گیج آتیان چمن و تفتان اٹی باقاعدہ و کانودی روزگار نا پوسکن ءُ وارخواہی ودی مریک وخت اس کہ باقاعدہ و کانودی واپار نا مون آ دننگ آن نئے بیرہ خراج آتا مد اٹ حکومت ءِ کٹیا مریک بلکن ہندی پوریاگر آتے ہم دانا فائدہ رسینگک۔ دیوان آن تران کرسا وزیراعلیٰ پارے کہ تعلقدار بنجائی و صوبائی محکمہ غاتے دوئی واکدارآتارداٹ ملکی فائدہ ٹی فیصلہ کننگک۔ اوپارے کہ او بنجائی حکومت نا بابت وزیراعظم تون ہم اوڑدہی کیک تانکہ دا ویل انا دمدستی و آخبتی بنداو تیا ایسر ممکن مننگ کے۔
