اسلام آباد۔ 03 جولائی (اےپی پی) بنجائی وزیر ڈٹ بندی، شونداری، اصلاحات و خصوصی گام گیج اسد عمر پارینے کہ مچ آ ملک اٹی الس کوروناوائرس نا تالانی ءِ توننگ کن جوڑ کروک آ ایس او پی ، گائیڈلائن و ڈاکٹر آتا مشورہ غاتیا عملدرآمد کریر ہرانا سوب آن اینو ہسپتال، آکسیجن، وینٹی لیٹرآتیا کورونا وائرس نا ناجوڑ آتا کچ و دا دین آن مرک آک کم نظر بننگ ءُ، مچ آ قوم ہنداوڑ ایس او پی تیا عمل ءِ برجاتخرہ تو جولائی نا ایسر اسکان کوروناوائرس نا زہمی تا کچ 5 لکھ آن ہم کم مریک۔ او جمعہ نادے آ نیشنل کمانڈ اینڈ آپریشن سینٹر (این سی او سی) ٹی میڈیا بریفنگ تسکہ۔ بنجائی وزیر اسد عمر پارے کہ این سی او سی تدوک آ مسہ ہفتہ ٹی مروک آ پیش رفت نا جاچ، داوخت اسکان دوئی مروک آ بھرم، جولائی نا تُو اکن حکمت عملی نا جاچ ءِ ہلنگا۔ اوپارے کہ کوروناوائرس نا تالان مفننگ کن جون اٹی رکھی گام گیج، ایس او پی و گائیڈ لائن تیا عملدرآمد کن غٹ بنجائی اکائیک پبی کڑد ادا کرینو، صوبائی حکومت آتا خواری نا سوب آن گچین ءُ بھرم اس دوئی مس۔ اوپارے کہ ایس او پی تیا عملدرآمد نا ہر ہفتہ جاچ ءِ ہلنگک، صنعت، دوکان، مارکیٹ، مسیت آتون اوار ہر جاگہ غا دا ہُننگے کہ ایس او پی تیا اخہ در عملدرآمد مننگ ءِ و ہراڑے ایس او پی تیا عمل مفننگ ءِ ہموڑے سختی اٹ عملدرآمد ءِ پک کننگے۔ اوپارے کہ سمارٹ لاک ڈاؤن نا نظام مئی ٹی بناکرے جون اٹی دادے پین ودفین، این سی او سی 20 ہند آتا پیدواری ءِ کرسا صوبہ غاتے اوفتا فہرست ءِ گدریفے ہراڑے صوبہ غاک سمارٹ لاک ڈاؤن خلکر و داکان پد انا حالیت آتا ہم این سی او سی جاچ ءِ ہلک کہ اوکان پد اخہ در پرخ تما، سمارٹ لاک ڈاؤن آن دین انا تالانی ٹی بھلو پرخ اس تما انتئے کہ اینو نن جون انا نیام اٹی نن ہراڑے سلوک ئسن اونا مقابلہ ٹی اینو ہسپتال ، آکسیجن،وینٹی لیٹر آتیا ناجوڑ آتا کچ کم ءِ۔ کوروناغان مرک آتیٹی ہم کمتی نظر بننگ ءِ۔ داگچینی داخاطرآن ءِ کہ الس رکھی گام گیج آتیا عملدرآمد ءِ گچین کرینو، اگہ بے احتیاطی مریک تو دا ناجوڑی ہندارفتار اتون پدی بریک۔ بھاز انگا ملک آتے ٹی دُن مس کہ ناجوڑی کم مس و ولدا دین آن زہمی مروک آتا کچ اٹی ترندی اٹ ودکی مسنے، دا المی ءِ کہ رکھی گام گیج آتیان عمل کین۔ اوپارے کہ آخبت ہم نن دا دین انا تالانی ءِ توننگ کن جوڑ کروک آ ایس او پی تیا پورو عمل کرسا جوڑ و بڑ کننگ آن پاناد، راجی فاصلہ برقرار، ماسک انا کاریم اٹ اتنگ و بے گرج وڑاٹ رش انگا ہندآتیا ہِننگ آن پاناد کون آ پارت آتیا سنجیدگی اٹ عمل کننگ نا گرج ءِ۔ اوپارے کہ انتظامیہ خواری اتون ایس او پی تیا عملدرآمد ءِ پک کرے، جون انا نیام اٹی پارے کہ چاہندار آتا رداٹ اگہ نن رکھی گام گیج آتے تینا کتون و انتظامی کارروائی کننگپک تو جولائی نا ایسر اسکان کورونا نا ناجوڑ آتا کچ 12 لکھ آن گدرینگک۔ انتئے کہ رکھی گام گیج، انتظامی کارروائی بھاز مسنے۔ اگہ ہنداوڑ ہنسا کانہ تو جولائی نا ایسر اسکان دا کچ 4 لکھ آن کم مریک۔ اوپارے کہ پاکستانی تا بھلو کچ اس ایس او پی، ڈاکٹر آتا مشورہ غاتیا عمل کریر و اومیت ءِ کہ آخبت داکان ہم جوان عمل مریک۔ اوپارے کہ سندھ انا علاقہ کراچی ٹی گچینی نظر بفننگ ءِ ، سندھ انا سرکڑدہ غاتون ہیت وگپ مننگ ءِ، این سی او سی ٹیم پین کاریم کیک کہ ہراوڑاٹ گچینی اٹ کاریم کننگ مریک، ایلو ملک آتیانبار کراچی ٹی ہم زوت گچینی نظر بریک۔
