وزیراعظم عمران خان نا 15 نیشنل پارک آتا جوڑ کننگ نا ڈٹ انا بناءِ کننگ نا وخت آ تران

مستین نا حکومت آک ماحولیات ءِ اہمیت تتوس، وخت بسنے کہ نن چاگڑد ءِ رکھ کننگ کن گام گیج کین
اسلام آباد۔ 02 جولائی (اے پی پی) وزیراعظم عمران خان پارینے کہ مستین نا حکومت آک ماحولیات ءِ اہمیت تتوس، داسہ وخت بسنے کہ نن چاگڑد ءِ رکھ کننگ کن گام گیج کین، نیشنل پارک آتا جوڑ کننگ بروک آ چین تیکن اہم ءُ گام اسے۔ ایکو ٹورازم ءِ پہہ مننگ و دنیا آن ہیل کننگ نا گرج ءِ۔ ہندی مخلوق نا اوار مننگ آن پارک و نایاب ساہدار تا رکھ ممکن مریک و روزگار نا وارخواہی ہم دوبریک۔ پوسکن آ سیل و سواتی علاقہ غاتا ملنگ آن مست بائی لاز جوڑ کننگے، شارتیکن ہم ماسٹر پلان و ٹاؤن پلاننگ نا گرج ءِ۔ داخیال آتا درشانی ءِ او پنچ شنبے نادے آ چاگڑد ءِ رکھ کننگ نا بھلا گام گیج آتا رداٹ 15 نیشنل پارک آتا جوڑ کننگ نا ڈٹ انا بناءِ کننگ نا وخت آ کرے۔ وزیراعظم نا سلاہکار ماحولیات ملک امین اسلم، خصوصی کمکار حوالکاری و شینکاری لیفٹیننٹ جنرل(ر) عاصم سلیم باجوہ، وزیراعظم نا خصوصی کمکار ڈاکٹر شہباز گل و وزیر مملکت موسمیاتی بدلی زرتاج گل آن بیدس ویڈیو لنک انا کمک اٹ وزیراعلیٰ پنجاب عثمان بزدار، وزیراعلیٰ خیبر پختونخوامحمود خان تون اوار صوبائی حکومت بشمول گلگت بلتستان و آزاد کشمیر نا نمائندہ غاک ہم ساڑی ئسر۔ ورلڈ بیک انا کنٹری ڈائریکٹر و ایشین ڈویلپمنٹ بینک، آئی یو سی این نا کنٹری ڈائریکٹر و ڈبلیو ڈبلیو ایف نا سینئر ڈائریکٹر ئسک ہم دود اٹی ساڑی ئسر۔ وزیراعظم عمران خان پارے کہ دا ڈٹ انا بناء آ مبارکباد پیش کیوہ۔ اوپارے کہ ملک انا آبادی ترند رفتاری اٹ ودنگ ءِ ، اگہ نن تینا زیباانگا سیل و سواتی علاقہ غاتے بچفتون تو بروک آ چین تے دا علاقہ غاک ہُننگ کن ملیپسہ۔ اوپارے کہ پاکستان زیبائی آن مالامال و تنوع آن پبی ءُ ملک اسے ، داڑے 12 ایکولوجیکل زون ءُ، دنیا ٹی اسہ جاگہ اس ہم داوڑنا تنوع خننگپک ولے مخلوق ءِ دافتا سمااف۔ننا صاحب اقتدار مخلوق چھٹی تے اڈتننگ کن پیشن نا ملک آتیا ہنارہ ہراڑے اوفتا بھلو بھلو ماڑی ءُ ، اوفتے پاکستان نا زیبائی نا سماہی اف، پاکستان نا وائلڈ لائف اٹی دنیا ءِ بھلو است خواہی اسے۔ اوپارے کہ 15 نیشنل پارک آتا جوڑ کننگ نا فیصلہ بروک آ چین تیکن اہم ءُ گام اسے۔ ننے داتم اسکان نیشنل پارک آتے چلیفنگ نا وڑوڈول بفک، نن پہہ مفنہ کہ دانا انتظام و انصرام ءِ ہمہ کروئی ءِ، و دافتے ہمہ رکھ کروئی ءِ۔ اوپارے کہ ایکو ٹورازم ءِ پہہ مننگ نا گرج ءِ، ننا پوسکن آ سیل و سواتی علاقہ غاک داوخت اسکان داخاطرآن رکھ ءُ کہ ہموفتسکان رسینگ کن روڈ اف۔ اووزیراعلیٰ خیبر پختونخوا ءِ پارت کرے کہ پوسکن آ سیل و سواتی علاقہ غاتے ہمووخت اسکان ملنگپ ہراوخت اسکان اوفتا بابت قاعدہ و جابطہ (بائی لاز) جوڑ مف۔ دُن انگا علاقہ غاتیا گاڈی تے دننگ نا بایدے موکل مف ورنہ اوتباہ مریرہ۔ بھاز انگا سیل و سواتی علاقہ داخاطرآن تباہ مسر کہ ہموجاگہ کن بائی لاز جوڑ کننگتو۔ وزیراعظم پارے کہ ایکو ٹورازم نا خواست آتے پہہ مننگ المی ءِ۔ مارگلہ ہلز ءِ ہم خراب کننگا۔ نن اونا رکھ اکن گام گیج کرین۔ وزیراعظم پارے کہ اللہ تعالیٰ دا ملک ءِ بے تحاشہ نعمت و زیبائی تسنے۔ نن 70 سال اٹی دا نعمت آتا قدر ءِ کتون۔ جنگل آتے بے دردی اٹ کاٹ کرسا کننگا و ڈویلپمنٹ کننگ نا وخت آ چاگڑد نا خیال ءِ تخنگتو۔ آبادی مسہ ہنداخہ مسنے۔ کرار کرار آ کل علاقہ غاک بھس مننگ ءُ۔ ننے تینا سیل و سواتی علاقہ غاتے بچفوئی ءِ۔ وزیراعظم پارے کہ 15 نیشنل پارک غٹ صوبہ و علاقہ غاتے ٹی جوڑ کننگک۔ صوبہ غاک ہم داٹی بشخ ہلنگ ءُ۔ بنجائی حکومت راہشونی کیک کہ دافتے ہمہ رکھ کروئی ءِ۔ ہندی مخلوق ءِ فائدہ مریک ولداگڑاداپارک آک بچرہ۔ ہندی مخلوق ءِ داوڑاٹ روزگار ہم دوبریک۔ وزیراعظم پارے کہ چترال اٹی مارخور نا نسل ءِ رکھ کننگ کن ہندی آبادی ءِ اوار کننگا۔ دانا جوان ءُ بھرم اس مون آبس۔ داسہ ہندی مخلوق تینٹ دافتا رکھ ءِ کیرہ۔ اوپارے کہ پاکستان ہموملک آتے ٹی اوار ءِ ہراڑے برفانی چیتا نا نایاب نسل ساڑی ءِ۔ ہنداوڑ مارکوپولو ششیپ اٹ بھاز انگانایاب ساہدار پاکستان اٹی اریر۔ ہندی مخلوق ءِ اوار کننگ آن نیشنل پارک و نایاب ساہدارتا رکھ اٹ کمک رسینگک و الس ءِ روزگار ہم دوئی مریک۔ وزیراعظم پارے کہ خیبر پختونخواٹی پوسکن آ سیل وسواتی علاقہ غاتے ملنگ آن مست ایکو ٹورازم نا بابت بائی لاز جوڑ کننگے۔ ننے دا بابت دنیا غان ہیل کننگ نا گرج ءِ۔ وزیراعظم پارے کہ گلوبل وارمنگ و ماحولیاتی بدلی ننا ملک اکن بھلو خطرہ اسے گلیشیئر نا دیر مننگ و موسم نا بدلی آن نن بھاز زہمی مرینہ۔ نن 100 ارب درخت خلنگ نا ڈٹ انا بناءِ کرین۔